काठमाडाैँ । कृषि, वन तथा पर्यावरणमन्त्री गीता चौधरीले किसानलाई मलको अभाव हुन नदिन सरकार गम्भीर रूपमा लागेको बताउनुभएको छ।
बुधवार प्रतिनिधि सभाका सांसदहरूले उठाएका प्रश्नहरूको जवाफ दिँदै मन्त्री चौधरीले हालै भारतसँग ५० हजार मेट्रिक टन रासायनिक मल खरिद गर्ने प्रक्रिया अघि बढाइएको जानकारी दिनुभयो। उहाँका अनुसार मध्यपूर्वमा देखिएको द्वन्द्वका कारण मलको उत्पादन तथा आपूर्तिमा असर परेकाले अन्तर्राष्ट्रिय बजारमा आपूर्ति र मूल्य दुवैमा चुनौती देखिएको छ।
मन्त्री चौधरीले सरकार किसानलाई लागत सहभागिताका आधारमा अनुदानमा मल उपलब्ध गराउँदै आएको उल्लेख गर्नुभयो। चालु आर्थिक वर्षमा हालसम्म ५ लाख ५४ हजार ७६२ मेट्रिक टन रासायनिक मल आपूर्ति भइसकेको र ४ लाख ६३ हजार १६० मेट्रिक टन किसानलाई बिक्री भइसकेको उहाँको भनाइ छ। साथै गोदाममा रहेको र भित्रिएर गोदाम इन्ट्री हुन बाँकी गरी हाल १ लाख ४४ हजार ५८५ मेट्रिक टन मल मौज्दात रहेको पनि उहाँले जानकारी दिनुभयो।
उहाँका अनुसार चालु आर्थिक वर्षको असारसम्म करिब ६ लाख मेट्रिक टन मल किसानलाई अनुदानमा उपलब्ध गराइने लक्ष्य राखिएको छ, जुन हालसम्मकै उच्च परिमाण हुने दाबी गरिएको छ।
मन्त्री चौधरीले आपूर्तिकर्ताहरूसँग भइसकेका सम्झौता अनुसार करिब १ लाख ८७ हजार मेट्रिक टन मल समयमै आपूर्ति हुन नसकेको पनि उल्लेख गर्नुभयो। आगामी धान रोपाइँको मौसमलाई लक्षित गर्दै मल अभाव हुन नदिन मन्त्रालयले आपूर्तिकर्तालाई निरन्तर ताकेता गरिरहेको उहाँले बताउनुभयो।
साथै, सरकारको सिफारिसमा जी–टु–जी माध्यमबाट भारतसँग ५० हजार मेट्रिक टन मल खरिद गर्न मन्त्रिपरिषद्ले सैद्धान्तिक सहमति दिइसकेको र प्रक्रिया अघि बढाइएको उहाँले जानकारी दिनुभयो।
मन्त्री चौधरीले रासायनिक मलको सन्तुलित प्रयोगसँगै जैविक तथा प्राङ्गारिक मलको प्रयोगलाई प्रोत्साहन गर्ने नीति पनि सरकारले अघि सारेको स्पष्ट पार्नुभयो ।
