काठमाडाैँ । प्रतिनिधिसभामा राष्ट्रिय स्वतन्त्र पार्टीका सांसद जगदीश खरेलले व्यक्त गरेको अभिव्यक्तिमाथि नियमापत्ति भएको छ ।
नेपाली कम्युनिस्ट पार्टी (नेकपा) का सांसद रमेश मल्लले खरेलले प्रयोग गरेको ‘तमासा’ शब्द असंसदीय र अपमानजनक भएको भन्दै संसद्को रेकर्डबाट हटाउन माग गरेका हुन् ।
प्रतिनिधिसभाको बैठकमा विपक्षी दलहरूको विरोधका बीच सभामुख डोलप्रसाद अर्याल ले बैठकलाई अगाडि बढाएका थिए । सो क्रममा पर्यटन विधेयक २०८२ माथि विचार गरियोस् भन्ने प्रस्तावमाथि छलफल अघि बढाइएको थियो ।
विधेयकमाथि धारणा राख्न रोष्ट्रम पुगेका सांसद खरेलले विपक्षी दलको विरोधलाई ‘तमासा’को संज्ञा दिएका थिए । त्यसपछि नेकपाका सांसद मल्लले उक्त शब्द संसदीय मर्यादाविपरीत भएको भन्दै नियमापत्ति गरेका हुन् ।
