काठमाडौं । सरकारले देशभर सार्वजनिक सवारी साधनको नयाँ दर्ता अर्को सूचना जारी नभएसम्मका लागि रोक्का गर्ने निर्णय गरेको छ।
यातायात व्यवस्था विभागले बिहीबार प्रदेश सरकारका सम्बन्धित मन्त्रालय तथा सबै स्थानीय तहलाई पत्राचार गर्दै सार्वजनिक सवारी साधनको नयाँ दर्ता रोक्न निर्देशन दिएको हो।
विभागका अनुसार सार्वजनिक यातायातको वैज्ञानिक व्यवस्थापन हुन नसक्दा अत्यधिक वायु प्रदूषण, सवारी चाप र ट्राफिक जाम बढ्दै गएको तथा आवागमनमा कठिनाइ उत्पन्न भएको छ। साथै इन्धनको बढ्दो मूल्यका कारण सार्वजनिक यातायात क्षेत्रमा थप असहज अवस्था सिर्जना भएकाले यस्तो निर्णय लिनुपरेको जनाइएको छ।
“सवारी तथा यातायात व्यवस्था ऐन, २०४९” को दफा २४ उपदफा (३) अनुसार वातावरण प्रदूषण, सवारी चाप, सडकको अवस्था तथा सार्वजनिक हितका कारण कुनै पनि प्रकारका सवारी साधनको दर्ता रोक्का गर्न सकिने कानुनी व्यवस्था रहेको विभागले उल्लेख गरेको छ।
उक्त निर्णयअनुसार अब प्रदेश तथा स्थानीय तह अन्तर्गतका कार्यालयबाट सार्वजनिक सवारी साधन, इलेक्ट्रिक सार्वजनिक सवारी साधनसमेत, को नयाँ दर्ता तत्कालका लागि बन्द गरिनेछ।
