काठमाडौं: काठमाडौं महानगरकी कार्यवाहक प्रमुख सुनिता डंगोल कान्स फिल्म फेस्टिभलमा सहभागी भएकी छिन् । उनी नेवारी समुदायको परम्परागत वेशभूषा लगाएर महोत्सवमा सहभागी भएकी हुन् । यस फेस्टिभलमा विश्वभरका चर्चित कलाकार, फिल्मकर्मी लगायतको सहभागिता हुने गर्दछ ।
विश्वप्रसिद्ध त्यस फेस्टिभलमा उहाँ चार दिन सहभागी भएर फेस्टिभलको अनुभव बटुल्ने तथा कान्स फेस्टिभलका प्रमुखलाई काठमाडौं भ्रमणको निम्तो समेत दिने कार्यक्रम छ ।
महानगरले निकट भविष्यमा आयोजना गर्न लागेको काठमाडौं फिल्म फेस्टिभलको पूर्वतयारी स्वरुप डंगोल कान्स गएकी काठमाडौं महानगरले जनाएको छ । यो महोत्सवअन्तर्गत काठमाडौं महानगरका टोल टोलमा फिल्म फेस्टिभल आयोजनाको तयारी भैरहेको छ ।
यसअघि तत्कालिन महानगर प्रमुख बालेन शाह पनि कान्स गएका थिए । युनेस्कोले काठमाडौं सहरलाई फिल्म सिटीको रुपमा घोषणा गरिसकेको छ ।
कान्स फिल्म फेस्टिभल यही २१ मे सम्म (बुधबारसम्म) फ्रान्समा आयोजना भइरहेको छ ।
