काठमाडौँ। प्रतिनिधि सभाका सांसदहरुले कृषि उत्पादन बढाउन अग्र्यानिक कृषि खेतीमा जोड दिनुपर्ने बताएका छन् ।
बुधवार सिंहदरबारमा बसेको कृषि समितिको बैठकमा बोल्दै सांसदहरुले यस्तो धारणा राखेका हुन् । उनीहरूले वैज्ञानिक अध्ययन र दीर्घकालीन योजनाअनुसारको कृषि नीति लागू गर्न सरकारको ध्यानाकर्षण समेत गराए ।
बैठकमा बोल्दै रास्वपाका सांसद सागर ढकालले कृषि क्षेत्रमा देखिएका समस्याको पहिचान गरी समाधानका उपाय सुझाउन विश्वविद्यालयहरूसँग सहकार्य गर्नुपर्ने धारणा राख्नुभयो । उहाँले कृषि औद्योगिकीकरणमा ध्यान दिनुपर्ने आवश्यकता औंल्याउँदै बाँदर तथा बँदेलको समस्या समाधानका लागि विशेष नीति अवलम्बन गर्नुपर्नेमा जोड दिनुभयो ।
उहाँले भन्नुभयो, ‘कृषि क्षेत्रमा देखिएका समस्याहरुको पहिचान गरि समाधानका उपायबारे सिफारिस गर्न विश्वविद्यालयलाई अनुरोध गरौँ । त्यस्तै कृषि औद्योगिकरणमा पनि हामीले फोकस गर्नुपर्छ । बाँदर तथा बँदेलको समस्या समाधानको लागि पनि विशेष नीति लागु गर्नुपर्छ । बाँदर मार्नुपर्छ भनेर हचुवाको तालमा चाँही बोल्नु हुँदैन ।’
नेकपा (एमाले) का सांसद लक्ष्मीप्रसाद पोखरेलले भूमि व्यवस्थापनमा सरकारको कार्यशैलीले नागरिकमा त्रास पैदा गरेको टिप्पणी गर्नुभयो । उहाँले ऐलानी जग्गामा जग्गामा बसोबास गर्दा पनि सरकारी जग्गा अतिक्रमण गरेको आरोप लाग्ने डर बढेको भन्दै त्यसले जनतामा अन्योल र असुरक्षा बढाएको भन्दै उहाँले सरकारको विरोध गर्नुभयो । उहाँले नागरिकमा देखिएको त्रासलाई आत्मविश्वासमा बदल्नेगरी सरकारले सोच्नुपर्ने धारणा राख्नुभयो ।
उहाँले भन्नुभयो,‘भूमि व्यवस्थापनको विषयमा सरकारको कामबाट पछिल्लो समयमा आतंक सिर्जना भएको छ । ऐलेनि जग्गामा बसोवास गर्नुपनि सार्वजनिक सरकारी जग्गा अतिक्रमण गर्नु हो भन्ने कुरा बुझेर जनतामा आतंक पैदा भएको छ । नागरिकमा जुन त्रास छ त्यसलाई आत्मविश्वासमा परिणत गर्नको लागि सरकार सम्बन्धीत मन्त्रालयले के गर्दैछ भन्ने विषयमा मन्त्रालयसँग कुरा गर्नुपर्नेछ ।’
नेपाली काँग्रेसका सांसद सन्तोष सुब्बाले रैथाने बालीको बीउ संरक्षणमा जोड दिनुभयो । उहाँले सरकारले रासायनिक मल अभाव भएको पनि भन्ने अर्को तर्फ स्वास्थ्यबारे पनि सजक हुनुपर्छ भन्ने दोधारे नीतिमा विरोधाभास रहेको बताउनु भयो । उहाँले अग्र्यानिक मल उत्पादनमा सरकारले लगानी बढाउनुपर्नेमा जोड दिनुभयो ।
उहाँले भन्नुभयो, ‘रैथाने बालीको बिउ बिजनको संरक्षण गर्ने कुरामा जोड दिनुपर्छ । धेरै जना मानीयज्यूले रासायनिक मल लगायतका समस्याको कुरा उठाउनुभएको छ ।
मैले सरकारको नबुझेको नीति के हो भने मल पुगेन भन्दै जाने अनि स्वास्थ्य जोगाउँ पनि भन्ने ? हाम्रो लक्ष्य के हो ? हामी कहाँ जान खोजिरहेका छौँ । यसको समाधानका उपायको खोजि गर्नुपर्छ । र अग्र्यानिक मल उत्पादनमा सरकारले लगानी गर्नुपर्छ ।’
बैठकमा बोल्ने अधिकांश सांसदहरुले कृषि उत्पादन बढाउन अग्र्यानिक मल उत्पादनमा जोड दिए । –न्युज एजेन्सी नेपाल
