दाङ । नेपाली कांग्रेसका सहमहामन्त्री डा. प्रकाशशरण महतले नेपालमा कम्युनिष्टहरुको मनपरीतन्त्र बढ्दै गएको बताएका छन् । उनले भने, देशमा अहिले अधिनायकवादीहरुको सरकार छ, उनीहरुलाई जे मन लाग्छ त्यो काम गर्न गैरकानुनी रुपमा अध्यादेश ल्याउने तयारी गरिरहेका छन् ।
देशमा कम्युनिस्टको सत्ताले मनपरीतन्त्र चलाएको कुरा सर्वत्र पुष्टि भइसकेको भन्दै यसको नियन्त्रण गर्न कांग्रेसलाई मतदान गर्न उनले आग्रह गरे । उनले भने, अब जनताले बुझ्न बाँकी छैन, अधिनायकवादका विविध स्वरुप उनीहरुले देखिसकेका छन् ।
दाङको उपनिर्वाचममा नेपाली कांग्रेसका प्रदेश सभा उम्मेदवार केशवराज आचार्यलाई मतदान गरी जिताउन उनले आह्वान गरे ।
आइतबार दाङको दुर्गम बस्तिहरु पन्चकुले, ढोलपुर र मलईमा आयोजित चुनावी सभालाई सम्बोधन गर्दै सहमहामन्त्री डा. महतले कम्युनिस्टले जनतालाई झुटा आश्वासन दिएर प्रलोभन देखाउने गरेको कुरा पुष्टि भइसकेको बताए ।
‘कांग्रेसले झुट बोल्दैन, जे बोल्छ त्यो गर्छ,’ नेता महतले भने, ‘कम्युनिस्टले कुरा एउटा काम अर्कै गर्छन् । सुशासनका गफ दिएर देशमा भ्रष्टाचार र कुशासन बढाएका छन् । जनतालाई सुरक्षा छैन ।’
सत्तारुढ दल नेपाल कम्युनिस्ट पार्टीका नेता तथा कार्यकर्तालाई उनले कांग्रेस प्रवेश गराएका छन् । प्रवेश हुनेहरुमा नेता बलबहादुर बस्नेतको नेतृत्वमा कुलबहादुर वली, टेकबहादुर विक, मनिराम बुढाथोकी, बलबहादुर बुढा, भद्रबहादुर बुढाथोकी, राजकुमार बुढाथोकी, तिलक घर्ती, टोपेन्द्र बुढाथोकी, मंगलसिंह बुढा, मिनबहादुर कुँवर, जोगबहादुर घर्ती, तिलक बस्नेत, पूर्णबहादुर घर्ती, वीरबहादुर बुढाथोकी, तिलकबहादुर घर्ती, वेलमती पुन, गौसरी पुन, पनिता वली, पूर्णकला परियार, निमकुमारी बुढाथोकी,यज्ञ बुढाथोकी लगायत चार दर्जन नेता कार्यकर्ता छन् ।
