काठमाडौं। बागमती नदी किनारका जोखिमपूर्ण बस्तीबाट विस्थापित भएका नागरिकहरूको स्वास्थ्य अवस्थालाई मध्यनजर गर्दै सरकारले दशरथ रंगशाला मा विशेष बहुआयामिक स्वास्थ्य शिविर सञ्चालन गरेको छ।
शिविरमा बालरोग, स्त्रीरोग, दन्त उपचार तथा मनोसामाजिक परामर्श सेवा उपलब्ध गराइएको छ। स्वास्थ्य सेवा प्रदान गर्न शुक्रराज ट्रपिकल तथा सरुवा रोग अस्पताल को नेतृत्वमा कान्ति बाल अस्पताल, परोपकार प्रसुती तथा स्त्रीरोग अस्पताल तथा पाटन मानसिक अस्पताल का विशेषज्ञ टोलीहरू खटिएका छन्।
शिविरमै बिरामीलाई आवश्यक औषधी र परामर्श प्रदान गरिने व्यवस्था मिलाइएको छ भने जटिल समस्या देखिएमा सरकारी अस्पतालमा रेफर गरिने व्यवस्था गरिएको छ। हालसम्म ६८ जनाले सेवा लिइसकेका छन्।
विस्थापनका कारण उत्पन्न हुन सक्ने मानसिक तनाव तथा संक्रमणजन्य जोखिमलाई ध्यानमा राख्दै पाटन मानसिक अस्पताल को टोलीले विशेष मनोसामाजिक परामर्श सेवा प्रदान गरिरहेको छ।
यसैबीच, कीर्तिपुर क्षेत्रमा पनि वीर अस्पताल को नेतृत्वमा अर्को स्वास्थ्य शिविर सञ्चालन भइरहेको छ। उक्त शिविरमा विशेषगरी आँखा र दाँत सम्बन्धी उपचारमा सेवाग्राहीहरूको आकर्षण देखिएको छ।
स्वास्थ्य शिविरहरू काठमाडौं महानगरपालिका र स्वास्थ्य सेवा विभाग सँगको समन्वयमा सञ्चालन गरिएको हो। शिविरका लागि पर्याप्त जनशक्ति तथा औषधीको व्यवस्था गरिएको जनाइएको छ।
