काठमाडौं । जुवाको खालबाट पक्राउ परेका मेजर राजेन्द्र शाही पुनः जिम्मेवारीमा फर्किएका छन् । मेजर शाही प्रधानमन्त्री केपी शर्मा ओलीको सुरक्षा टोलीका सेनानी हुन् ।
महानगरीय प्रहरी प्रभाग, बसपार्कको टोलीले उनलाई १० कात्तिकमा सामाखुशीमा म्यारिज खेलिरहेका बेला जुवाखालबाट एक लाख ५९ हजार ३ सय रुपैयाँसहित पक्राउ गरेको थियो । प्रहरीले शाहीसंगै घरधनी सोमबहादुर मगर, रामेछापका बुद्धिलाल मगर, गोरखाका जित गुरुङ र किरणजंग शाह, टोखाका मानकाजी गुरुङ र धर्म शाह तथा सुर्खेतका रिनज राणा पक्राउ परेका थिए ।
उनीहरुविरुद्ध जुवा ऐनअनुसार जिल्ला प्रशासन कार्यालय, काठमाडौंमा मुद्दा चलाइएको थियो । प्रशासनले शाहीलाई २० हजार धरौटीमा छाड्ने आदेश दिएपनि शाहीमाथि लागेको मुद्दाको अन्तिम किनारा नलाग्दै जंगीअड्डाले जिम्मेवारीमा फर्काएको हो ।
काठमाडौंका सहायक प्रमुख जिल्ला अधिकारी कृष्णबहादुर कटुवालका अनुसार जुवा सम्बन्धी कसूरको अन्तिम फैसला आउन ३ महिनादेखि एक वर्षसम्म लाग्नसक्छ ।
यो मुद्दा सैनिक अदालतबाट चलेको भए कसूर प्रमाणित नभएसम्म थुनामै राखेर अनुसन्धान हुनसक्थ्यो । तर भदौ दोस्रो साता सर्वोच्च अदालतले ब्यारेक बाहिर सेनाले गरेको अपराधजन्य कार्यमा ‘कोर्ट मार्सल’ लगाउन नपाइने व्याख्या गरिदियो ।
