पोखरा । कास्की क्षेत्र नं. २ को प्रतिनिधिसभा सदस्यमा सत्तारुढ दल नेपाल कम्युनिस्ट पार्टी (नेकपा)की विद्या भट्टराई विजयी भएकी छन् । भट्टराईले ८ हजार ४०३ मतान्तरले चुनाव जितेकी हुन् ।
आइतबार साँझ सकिएको मतगणनाअनुसार भट्टराईले २४ हजार ३९४ मत पाएकी थिइन् । उनका निकटतम प्रतिद्वन्द्वी नेपाली कांग्रेसका खेमराज पौडेलले १५ हजार ९९१ मत पाएका छन् । निर्वाचित भएको घोषणा भएपछि भट्टराईले आफ्ना दिवंगत पति रवीन्द्र अधिकारीलाई सम्झिइन् । ‘यो जनमत रवीन्द्र अधिकारीप्रतिको सम्मान र नेकपा र म प्रतिको भरोसा मानेको छु’ उनले भनेकी छन् ।
कास्की २ बाट निर्वाचित अधिकारीको गत फागुनमा भएको हेलिकप्टर दुर्घटनामा निधन भएको थियो । त्यही कारण रिक्त भएको प्रतिनिधिसभा सदस्यका लागि कास्की २ मा १४ मंसिरमा उपचुनाव भएको थियो ।
विजयी भएपछि निर्वाचन अधिकारीहरूबाट प्रमाणपत्र लिँदै । तस्वीरः रासस 
विद्या भट्टराइ चुनाव जितेपछि समर्थकलाइ अभिवादन गर्दै । तस्वीरः रासस
मत गणना सकिए लगतै कांग्रेस उम्मेदवार पौडेलले भट्टराईलाई माला र खादा लगाई बधाई दिएका थिए । उनले राम्रोसँग काम गर्न समेत आग्रह गरे ।
कास्की २ को चुनावमा समाजवादी पार्टी तेस्रो स्थानमा रह्यो । उसका हेमराज गुरुङले १ हजार ९२२ मत पाए । राप्रपाका रोमबहादुर भण्डारीले ११ हजार १५३ मत पाउँदा साझा पार्टीकी राजनी केसी ९४२ मतका साथ पाँचौं स्थानमा रह्यो ।
रवीन्द्र मिश्र नेतृत्वको साझा पार्टीले यो उपचुनावलाई मिनी जनमत संग्रह भनेको थियो र कास्की २ बाट विजयको विगुल फुक्ने दाबी गरेको थियो । तर चुनावको पूर्वसंध्यामा पार्टी प्रवेश गरेकी केसीले साझाको अपेक्षा अनुसार मत पाइनन् ।
यस्तै विवेकशील नेपाली दलकी जमुना शर्माको मत १०० पनि कटेन । उनले मात्र ७७ मत पाइन् ।
