तेहरान। कतारी समाचार च्यानल अल अरबीले तेहरानमा रहेको आफ्नो कार्यालय रहेको भवनमा इजरायली क्षेप्यास्त्र प्रहार भएको र यसबाट कार्यालयमा क्षति पुगेको जनाएको छ ।
“इजरायली क्षेप्यास्त्रले राजधानी तेहरानमा रहेको अल अरबी टिभी च्यानलको भवनलाई लक्षित गरेको छ । आक्रमणबाट अरबी च्यानलको कार्यालयमा व्यापक क्षति भएको र प्रत्यक्ष प्रसारण अवरूद्ध भएको छ,” अल अरबीलले सामाजिक सञ्जाल एक्समा एक पोस्टमा उल्लेख गरेको छ।
कार्यालयभित्रको फुटेजमा फुटेका झ्याल, फुटेको सिसा र भग्नावशेष देखिएको छ । भवनको बाहिर, तस्बिरहरूले सडकहरू भग्नावशेषले ढाकिएको र वरपरका भवनहरूमा पनि क्षति पुगेको देखाइएको छ।
उक्त क्षेत्रमा कुन कुन संरचनामा लक्षित गरिएको थियो भन्ने स्पष्ट भइसकेको छैन । अल अरबीको कार्यालय उत्तरपूर्वी तेहरानको आवासीय भागमा अवस्थित छ।
तेहरानस्थित च्यानलका ब्यूरो प्रमुख हाजेम कल्लासले भन्नुभयो, “म युद्धको रिपोर्ट गरिरहेको थिए । एक्कासी कायौलयमा मिसाइल प्रहार भयो।”
कल्लासले एक्समा पोस्ट गरेको एक भिडियोमा चार तले भवनको विशेष गरी पहिलो र दोस्रो तलामा अग्रभागमा स्पष्ट रूपमा क्षतिग्रस्त भएको देखिएको छ।
“भवन भएको यो क्षेत्र आवासीय र व्यावसायिक दुवैका लागि हो,” उहाँले भन्नुभयो, “भवनमा फिजियोथेरापी सेन्टर, ब्युटी सैलुन, डेन्टल क्लिनिक र क्याफे पनि छन्।”
फेब्रुअरी २८ मा इजरायल र संयुक्त राज्य अमेरिकाले इस्लामिक गणतन्त्रविरुद्ध आक्रमण गरेपछि इरानमा युद्ध सुरु भएको थियो, जसका कारण इरानका सर्वोच्च नेतालगायत कैयौँ नेता मारिएका छन् । द्वन्द्वको प्रभाव अहिले मध्यपूर्वमा फैलिएको छ ।
मार्च २ मा रुसको सरकारी आरटी टेलिभिजन न्युज नेटवर्कले उत्तरी तेहरानमा रहेको आफ्नो कार्यालयमा इजरायली आक्रमणमा क्षति पुगेको बताएको थियो । रासस
