काठमाडौँ । नेपालमा रेमिट्यान्स र इन्धनको प्रमुख स्रोत रहेका मध्यपूर्वी देशहरुमा बढ्दो तनावका कारण मुलुकको अर्थतन्त्र र ऊर्जा क्षेत्रमा नकारात्मक प्रभाव पर्नसक्ने चेतावनी दिइएको छ।
नेपाल आर्थिक पत्रकार समाज (सेजन)ले आज आयोजना गरेको ‘पश्चिम एसियाको समस्या र नेपाली अर्थतन्त्रमा देखिने प्रभाव’ विषयक अन्तरक्रियामा अर्थ–आप्रावसन क्षेत्रका विशेषज्ञहरुले सरकारले तत्काल पूर्वतयारीमा ध्यान दिनुपर्ने सुझाव दिए। अमेरिकी–इजरायल र इरानी तनावले विश्वव्यापी ऊर्जा सङ्कट गहिरिँदै गएको र नेपालजस्ता रेमिट्यान्समा निर्भर र आयातित इन्धनमा भरपर्ने मुलुकमा असर पर्ने बताइएको छ।
पूर्वराष्ट्र बैंकका कार्यकारी निर्देशक डा. गुणाकर भट्टले पेट्रोलियम पदार्थ र दैनिक अत्यावश्यक वस्तुको उचित मौज्दात राख्न र त्यसको व्यवस्थापनमा सरकार सक्रिय हुनुपर्ने जोड दिए। “नेपाल पेट्रोलियम पदार्थको आयातमा भारतमा निर्भर छ, त्यहाँ अभाव देखिए नेपालमा तत्काल प्रभाव पर्छ,” उनले भने ।
श्रम आप्रवासन विशेषज्ञ रामेश्वर नेपालले मध्यपूर्वी तनावका कारण नेपाली श्रमिकको रोजगारी र सुरक्षामा चुनौती थपिने बताए। अहिले खाडी मुलुकमा झन्डै २० लाख नेपाली श्रमिक कार्यरत छन्। उहाँले प्रभावित क्षेत्रका श्रमिकलाई उद्धार र सुरक्षामा सरकारले सुनिश्चित कदम चाल्नुपर्ने बताएका छन्।
सेजनका अध्यक्ष भागवत भट्टराईले ठूलो संख्यामा नेपाली श्रमिक रहेका मध्यपूर्वी क्षेत्रमा विकसित घटनाक्रमले नेपालमा आर्थिक र सामाजिक अस्थिरता निम्त्याउन सक्ने र त्यसका लागि सरकारलाई चाँडै योजना बनाउन आवश्यक रहेको उल्लेख गरे।
