काठमाडौँ । गण्डकी प्रदेशका पूर्व सांसद राजीव गुरुङ(दीपक मनाङे) , कैद सजाय भुक्तान गरी बुधबार जेलबाट छुटेका छन्। उनीमाथि ज्यान मार्ने उद्योगको दोष लाग्ने गरी डिल्लीबजार कारागार चलान गरिएको थियो।
२०६१ वैशाख ३१ मा काठमाडौँ महाराजगन्जस्थित चुफाङ रेस्टुरेन्टमा गुन्डा नाइके चक्रे मिलनको समूह र मनाङे समूहबीच भएको झगडामा मनाङे दोषी ठहर भएका थिए। सोही घटनामा मनाङेले धारिलो हतियार प्रहार गरी मिलनको बायाँ हात छिनाइदिएका थिए। घाइते मिलनलाई त्रिवि शिक्षण अस्पताल महाराजगन्जमा उपचारपछि हात जोडिएको थियो। चक्रे मिलनकी पत्नीले मनाङेसहित पाँच जनाविरुद्ध ज्यान मार्ने उद्योगमा प्रहरीमा जाहेरी दर्ता गराएकी थिइन्।
उच्च अदालत पाटनले पाँच वर्ष जेल सजाय सुनाएपछि मनाङेले केही समय कारागार बाहिर रहँदै मुद्दा लड्ने सुविधा पाएका थिए। तर सर्वोच्च अदालतले २०८१ कात्तिक २० गते उच्च अदालतको फैसला सदर गरेपछि उनी २०८१ कात्तिक २७ गते पक्राउ परेका थिए। मनाङेले २० प्रतिशत कैद छुट पाए पनि कुल पाँच वर्षको सजायको बाँकी अवधि भुक्तान गर्दै बुधबार जेलबाट मुक्त भएका हुन्।
मनाङेको यस घटनापछि धेरैपटक जेल भुक्तान गर्दा उनीले कुल दुई वर्ष आठ महिना जेल भोगिसकेका थिए।
