काठमाडौँ । राष्ट्रिय सभामा नेपाली कांग्रेसका सांसद जितजंग बस्नेतले पार्टी सभापति गगनकुमार थापाको राजीनामा माग गरेका छन्।
बुधबार सिंहदरबारमा आयोजित पार्टीका राष्ट्रिय सभाका बहालवाला तथा नवनिर्वाचित सांसदहरूबिचको परिचयसहितको अन्तरक्रिया कार्यक्रमपछि सञ्चारकर्मीसँग कुरा गर्दै बस्नेतले पार्टीले हालैको निर्वाचनमा व्यहोरेको हारको नैतिक जिम्मेवारी नेतृत्वले लिनुपर्ने बताए।
उनले विशेष महाधिवेशनकै कारण पार्टीले लज्जास्पद हार बेहोर्नुपरेको जिकिर गर्दै सभापति थापाले पदबाट राजीनामा दिनु उपयुक्त हुने धारणा राखे।
बस्नेतले विशेष महाधिवेशनको औचित्य नै समाप्त भइसकेको दाबी गरे। उनका अनुसार निर्वाचनअघि नै पार्टीभित्र सहमति, सहकार्य र एकताको वातावरण निर्माण गरेर चुनावमा एकजुट भएर जाने प्रस्ताव गरिएको भए पनि त्यो सुझावलाई बेवास्ता गरिएको थियो।
उनले पार्टीको नीति नै सहमति, सहकार्य र एकता भएको उल्लेख गर्दै अधिवेशनलाई निर्वाचनपछि सार्नुपर्ने मत आफूहरूले राखेको तर त्यसलाई नमानिएको बताए। विशेष महाधिवेशनको नाममा गरिएको भेलामार्फत पार्टी ‘कब्जा’ गरिएको आरोप समेत उनले लगाए।
बस्नेतले उक्त विशेष महाधिवेशन निर्वाचन आयोगसँग ‘सेटिङ’ गरेर गरिएको भन्दै त्यसकै परिणामस्वरूप पार्टी निर्वाचनमा पराजित भएको दाबी गरे। आगामी दिनमा पार्टी पुनः उठ्नका लागि आन्तरिक एकता अपरिहार्य रहेको उनको भनाइ थियो।
उनले नेतृत्वले हारको जिम्मेवारी स्वीकार गरी मार्ग प्रशस्त गर्ने विश्वास व्यक्त गर्दै सभापति थापाले राजीनामा दिने अपेक्षा आफूलाई रहेको बताए।
