काठमाडौं।नेकपा एमालेका नेता योगेश भट्टराईकोले पछिल्लो निर्वाचन परिणामपछि पार्टीभित्र आत्मसमिक्षा गर्दै खुला छलफल आवश्यक रहेको बताएका छन्।
सामाजिक सञ्जालमार्फत आफ्नो धारणा सार्वजनिक गर्दै उनले सही नीति, संगठन, नेतृत्व र कार्यशैलीमार्फत पार्टी पुनः उठ्न सक्ने विश्वास व्यक्त गरेका छन्।
भट्टराईले पछिल्ला तीन दिनमा करिब एक हजारभन्दा बढी पार्टीका नेता–कार्यकर्ता तथा शुभेच्छुकसँग फोन र सन्देशमार्फत संवाद भएको बताएका छन्। ती संवादहरूमा सुझाव, टिप्पणी, विरोध, आक्रोश, निराशा, सम्भावना, उपाय र दृढतासहित विभिन्न धारणा आएको उनले उल्लेख गरेका छन्।
उनले निर्वाचनमार्फत जनताले आफ्नो मतद्वारा पार्टीको नीति र नेतृत्वलाई शान्तिपूर्ण रूपमा अस्वीकार गरेको स्वीकार गर्दै त्यसलाई वर्तमान यथार्थका रूपमा लिनुपर्ने बताएका छन्। उनले पार्टीभित्र व्यापक रूपान्तरणमार्फत जनसमर्थन पुनः प्राप्त गर्नुपर्नेमा जोड दिएका छन्।
भट्टराईका अनुसार भाद्र २३ र २४ पछि पार्टीले लिएका कतिपय नीतिहरू ठीक नभएको भन्दै आफूहरूले नेतृत्व र पार्टी पंक्तिलाई बैठक, भेटघाट तथा महाधिवेशनमार्फत पटक–पटक सच्याउन आग्रह गरे पनि सफल हुन नसकेको बताएका छन्। अब ती विषयमा पुनः छलफल र बहस आवश्यक रहेको उनको भनाइ छ।
विशेषगरी केन्द्रीय समिति र केन्द्रीय सचिवालयले सफलता वा असफलताको भार बोक्नुपर्ने उनको धारणा छ।
भट्टराईले विगतका गुटगत घेराबाट बाहिर निस्केर खुला र स्पष्ट छलफलमा सहभागी हुन सबै नेता तथा कार्यकर्तालाई आह्वान गरेका छन्। साथै पार्टी, जनसंगठन र विदेशमा रहेका समितिहरूका सदस्यहरूलाई आफ्ना सुझाव पार्टी नेतृत्वसमक्ष पठाउन आग्रह गरेका छन्।
“कमरेडहरू, हामी ढलेका मात्र हौं, मरेका होइनौं,” भन्दै उनले संयम र धैर्यताका साथ पार्टी एकता जोगाउँदै आत्मभर्त्सना होइन, आत्मसमिक्षाको बाटोमा अघि बढ्न आग्रह गरेका छन्।
साथै उनले बुद्धिजीवी र आम नागरिकलाई पनि एमालेबारे आफ्ना सुझाव, आलोचना र टिप्पणीहरू दिन अपिल गरेका छन्।
उनले राष्ट्रिय एकता, नेपाली सार्वभौमिकताको रक्षा तथा बाम–लोकतान्त्रिक विचारधाराको संरक्षणलाई साझा राष्ट्रिय जिम्मेवारीका रूपमा उल्लेख गर्दै सकारात्मक राजनीतिक सहकार्यका लागि सबैलाई आह्वान गरेका छन्।
