स्पेनिस ला लिगा फुटबलमा शनिबार राति भएको खेलमा बार्सिलोना बराबरीमा रोकिएको छ ।बार्सिलोनाले स्पानियोलसंग २–२ को बराबरीमा खेल सकाएको हो । खेलको २३ औँ मिनेटमा डभिड लोपेजले गोल गर्दै घरेलु टोली स्पानियोललाई अग्रता दिलाएका थिए । तर ५० औ मिनेटमा लुईस स्वारेजले खेल बराबरीमा ल्याए । अर्टुरो भिडालले ५९ औ मिनेटमा बार्सिलोनालाई अघि बढाएका थिए ।
फ्रेन्की डी जोङ ७५ औ मिनेटमा रातो कार्ड खादै मैदान बाहिरिएपछि पाहुना टोली १० खेलाडीमा सिमित बनेको थियो । लिग तालिकाको पुछारमा रहेको स्पानियोलसंग बराबरी खेल्नु पर्दा बार्सिलोनाले अंक बाँड्नु परेको हो । खेल सकिन दुई मिनेट अघि चीनियाँ खेलाडी उ लिले गोल गर्दै घरेलु टोलीलाई अंक दिलाउन सफल रहे ।
बार्सिलोनाविरुद्व गोल गर्ने उनी पहिलो चिनियाँ खेलाडी बने । अंक जोड्दै बार्सिलोना तालिकाको शीर्ष स्थानमा उक्लिएको छ । शीर्ष स्थानको बार्सिलोना र रियलको समान ४० अंक छ । बार्सिलोना गोल अन्तरका आधारमा शीर्ष स्थानमा रह्यो ।
