आइसिसि टी–२० विश्वकप क्रिकेट अन्तर्गत आइतबार सम्पन्न पहिलो खेलमा आयोजक श्रीलंका इङल्यान्डसँग ५१ रनले पराजित भएको छ ।
इङल्यान्डले जितका लागि दिएको १४७ रनको लक्ष पछ्याएको श्रीलंका १६.४ ओभरमा ९५ रनमा अलआउट भएको थियो । श्रीलंकाको पाल्लिकेली रंगशालामा भएको अपराह्नको खेलमा श्रीलंकाका लागि कप्तान दासुन शनाकाले सर्वाधिक ३० रन बनाएका थिए ।
बोर्डमा ३४ रहँदा श्रीलंकाका पाँच खेलाडी पभेलियन फर्किसकेका थिए ।
श्रीलंकालाई सस्तैमा आउट गर्नेक्रममा विल ज्याक्सले ३, जोफ्रा आर्चर, लियाम डसन र आदिल रसिदले समान दुई दुई तथा जेमी ओभरटनले १ विकेट लिएका थिए ।
यसअघि टस हारेर ब्याटिङको निम्तो पाएको इङल्यान्डले समेत खराब सुरुआत गरेको थियो । यद्यपी, प्रारम्भिक ब्याटर फिल साल्टले ४० बलको सामना गर्दै सर्वाधिक ६२ रन बनाएका थिए ।
इङल्यान्डका लागि विल ज्याक्सले २१, कप्तान ह्यारी ब्रुकले १४ रन बनाएका थिए ।
यो जितका साथ इङल्यान्डले २ अंक बटुलेको छ । सुपर ८ को समूह दोस्रोमा इङल्यान्डसहित श्रीलंका, पाकिस्तान र न्युजील्यान्ड रहेका छन् । शनिबारको खेल वर्षाका कारण अबरुद्ध भएपछि पाकिस्तान र न्युजील्यान्डले एक एक अंक पाएका छन् ।
आजै ७.१५ बजे भारतको अहमदाबादमा भारत र दक्षिण अफ्रिका बिच खेल हुँदैछ ।
