आइसिसि टी–२० विश्वकप अन्तर्गत आज तीन खेल हुँदैछन् । खेल तालिका अनुसार आज पहिलो खेलमा अस्ट्रेलियाले जिम्बाबेको सामना गर्नेछ ।
समूह बी मा रहेको अस्ट्रेलियाले यसअघिको खेल जितेर उच्च मनोबलका साथ मैदानमा उत्रनेछ । श्रीलंकाको आर प्रेमदासा रङ्गशालामा हुने यो खेल बिहान ११.१५ बजे सुरु हुनेछ ।
यस समूहमा आयोजक श्रीलंका पनि रहेको छ । उसले विश्वकपका दुबै खेल जितेर ४ अंक बटुलेको छ । श्रीलंकाले ओमान र आयरल्यान्डलाई पराजित गरेको थियो ।
यस्तै एक खेल खेलेको अस्ट्रेलियाको २ अंक छ । अस्ट्रेलियाले यसअघि आयरल्यान्डलाई पराजित गरेको थियो ।
दोस्रो खेल क्यानडा र युएई बिच हुनेछ । भारतको दिल्लीमा हुने यो खेल अपराह्न ३.१५ बजे सुरु हुनेछ । समूह डी मा रहेका यी दुबै टिमले एक एक खेल खेलिसकेका छन् तर जित्न सकेका छैनन् ।
तेस्रो खेल नेदरल्यान्ड्स र युएसए बिच भारतको चेन्नाईमा हुनेछ । यो खेल साँझ ७.१५ बजे सुरु हुनेछ । नेदरल्यान्ड्सले एक जित र एक हार व्यहोरेको छ भने युएसए टिमले खेलेका दुबै खेल हारेको छ ।
