काठमाडौँ । प्रदेश संरचना खारेज गरी सनातन संवैधानिक राजसंस्था स्थापना गर्न आह्वान गर्दै मोबाइलमा सामूहिक सन्देश पठाएको आरोपमा प्रहरीले चितवनका ३४ वर्षीय निर्देश सेढाईंलाई पक्राउ गरेको छ। उनलाई मंगलबार राति काठमाडौँको हात्तीसारबाट पक्राउ गरिएको उपत्यका अपराध अनुसन्धान कार्यालयले जनाएको छ।
गाडी व्यवसाय गर्दै आएका सेढाईंले नेपाल टेलिकमको गेटवे प्रयोग गरी ‘एटी अलर्ट’ मार्फत करिब ५० लाख एसएमएस पठाएको प्रारम्भिक अनुसन्धानमा खुलेको छ। उनले ५० लाख मानिसलाई सन्देश पठाएको स्वीकार गरेको प्रहरीले जनाएको छ।
सेढाईंले पठाएको सन्देशमा प्रदेश संरचना हटाई प्रत्यक्ष निर्वाचित संरचनासहितको सनातन संवैधानिक राजसंस्था स्थापना गर्न आह्वान गरिएको थियो। साथै, पुस ३० गते दिउँसो १२ बजे निषेधित क्षेत्र बालुवाटारमा उपस्थित हुन आग्रह गरिएको थियो।
सन्देशमार्फत जनतालाई आतङ्कित पारेको आरोपमा सेढाईंमाथि सार्वजनिक हितविरुद्धको कसुरमा अनुसन्धान अघि बढाइने प्रहरीले जनाएको छ।
