काठमाडौँ । काठमाडौँ महानगरपालिकाका मेयर तथा राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहले माघ ४ गते मेयर पदबाट राजीनामा दिने तयारी गर्नुभएको छ ।
शाहको सचिवालयका अनुसार आगामी फागुन २१ गते हुने प्रतिनिधिसभा निर्वाचनमा उम्मेदवारी दिन उहाँले पदबाट राजीनामा गर्न लागेका हुन्। बालेन प्रतिनिधिसभा सदस्यका लागि झापा क्षेत्र नम्बर ५ बाट उम्मेदवार बन्ने तयारीमा छन्।
राजीनामापछि बालेनले जनकपुरमा एक कार्यक्रम आयोजना गर्ने र त्यसपछि झापा प्रस्थान गर्ने कार्यतालिका रहेको सचिवालयले जनाएको छ। त्यसअघि उनी रास्वपाको केन्द्रीय कार्यालय ‘घण्टी घर’ जाने कार्यक्रम समेत रहेको छ। माघ ६ गते मनोनयन दर्ताका लागि बालेन झापा पुग्ने तयारीमा छन्।
झापा–५ पूर्व प्रधानमन्त्री तथा नेकपा एमालेका अध्यक्ष केपी शर्मा ओलीको निर्वाचन क्षेत्रसमेत हो। निर्वाचनको तयारीस्वरूप बालेनले सोमबार रास्वपाका झापास्थित नेताहरूसँग छलफल गरेको बताइएको छ।
