काठमाडौंः सोमबारदेखि नेपाल विद्युत प्राधिकरणले काठमाडौं उपत्यकामा बिजुलीका तार भूमिगत गर्ने भएको छ । प्रधामन्त्री केपी शर्मा ओलीले तार भूमिगत कार्यक्रमको औपचारिक उद्घाटन गर्ने भएका छन् । पहिलो चरणमा आजदेखि रत्नपार्क र महाराजगञ्ज विद्युत वितरण केन्द्र अन्तर्गतका क्षेत्रमा बिजुलीको तार जमिनभित्र (अन्डरग्राउन्ड) गर्ने भएको हो ।
काठमाडौं उपत्यकाको विद्युत वितरण प्रणालि र त्यसको सुदृढीकरणका लागि बिजुलीको तारलाई भूमिगत गर्न लागिएको हो । प्राधिकरणले बिजुली वितरण भूमिगत गर्न सडक विभागबाट स्वीकृति लिएपछि यो कामको शुरु गर्न लागेको हो । विद्युत प्राधिकरणका प्रवक्ता प्रवल अधिकारीका अनुसार अन्डरग्राउन्डको काम आजैबाट शुरु हुनेछ ।
बिजुली तारलाई अत्याधुनिक प्रविधिबाट ठाउँ–ठाउँमा प्वाल पारेर जमिनमुनी राखिने भएको छ । यसका लागि सडक यत्रतत्र खन्न नपर्ने बताइृएको छ । तार भूमिगत गर्न भारतको केइआइकके कम्पनीले ठेक्का पाएको छ। रत्नपार्क र महाराजगञ्ज स्मार्ट कम्युनिकेसनुको क्षेत्र भएकाले पहिलो चरणमा भूमिगत गर्न लागिएको प्राधिकरणले जनाएको छ।
एसियाली विकास बैंक (एडिबी) ले विद्युत वितरण प्रणालीलाई भूमिगत गर्न १५ अर्ब रुपैयाँ ऋण सहयोग गरेको छ । दुई वितरण केन्द्रमा तार भूमिगत भएपछि ९० हजार विद्युत उपभोक्ता लाभान्वित हुने छन्। विद्युत वितरण प्रणालीलाई भूमिगत गर्न सर्भे भइसकेको छ। प्राधिकरणले घरैबाट बिजुलीको बिल तिर्न मिल्ने गरी दुई वर्षभित्र अन्डरग्राउन्डको काम सम्पन्न गर्ने लक्ष्य लिएको छ।
