काठमाडौँ । इङ्गल्याण्डविरुद्ध एडिलेड ओभलमा खेलिएको एशेज सिरिजको तेस्रो टेस्टमा अस्ट्रेलियाले ८२ रनको जित दर्ता गरेको छ। यस जितसँगै अस्ट्रेलियाले पाँच टेस्टको सिरिज आफ्नै नाममा पार्दै ३–० को अपराजित अग्रता बनाएको छ। यसअघि पर्थ र ब्रिसबेनमा अस्ट्रेलियाले दुवै टेस्ट ८–८ विकेटले जितेको थियो।
अस्ट्रेलियाले पहिलो इनिङ्समा ३७१ रन बनाएको थियो, जसको जवाफमा इंग्ल्यान्डको टोली २८६ रनमै समेटियो। त्यसपछि अस्ट्रेलियाले दोस्रो इनिङ्समा ३४९ रन बनाउँदै इङ्गल्याण्डलाई ४३४ रनको लक्ष्य दियो।
लक्ष्य पछ्याउने क्रममा इङ्गल्याण्डको टोली संघर्षरत देखियो र सम्पूर्ण टोली लक्ष्यभन्दा ८२ रन कममै अलआउट भयो। यस जितसँगै अस्ट्रेलियाले घरेलु मैदानमा एशेज सिरिजमा आफ्नो वर्चस्व कायम राखेको छ।
अस्ट्रेलियाका तर्फबाट दोस्रो इनिङ्समा प्याट कमिन्स, मिचेल स्टार्क र नाथन लायनले ३–३ विकेट लिए भने स्कट बोल्यान्डले १ विकेट हात पारे।
एलेक्स केरी ‘प्लेयर अफ द म्याच’ घोषित भए। उनले पहिलो इनिङ्समा १०६ रन, दोस्रो इनिङ्समा ७२ रन बनाए र ६ वटा क्याच पनि लिए।
पाँचौँ दिन जेमी स्मिथले इंग्ल्यान्डको आशा जगाए
इङ्गल्याण्डले चौथो दिनको खेल ६ विकेटको क्षतिमा २०७ रन बनाउँदै समाप्त गरेको थियो, जसपछि जितको सम्भावना निकै कमजोर देखिएको थियो। तर पाँचौँ तथा अन्तिम दिन जेमी स्मिथले ६० रनको महत्वपूर्ण पारी खेल्दै एक समय इंग्ल्यान्डको आशा जगाए। उनी आउट हुँदा इंग्ल्यान्डको स्कोर २८५ रन पुगेको थियो र टोली लक्ष्य नजिक देखिन थालेको थियो।
तर त्यसपछि विल ज्याक्स ४७ रनमा आउट भए र जोफ्रा आर्चर पनि पभेलियन फर्किए। इङ्गल्याण्डको अन्तिम झट्का जोश टंगका रूपमा आयो। ब्रायडन कार्स ३९ रनमा नटआउट रहे।
नाथन लायन घाइते, बैसाखीको सहारामा स्क्यानका लागि गए
एडिलेड ओभलमा भइरहेको एशेज सिरिजको तेस्रो टेस्टका क्रममा अस्ट्रेलियाका दिग्गज अफ–स्पिनर नाथन लायन घाइते भए। ३८ वर्षीय लायन, जो यस खेलमा अस्ट्रेलियाका दोस्रो सर्वाधिक टेस्ट विकेट लिने बलर बनेका थिए, पाँचौँ दिन बिहान फिल्डिङका क्रममा चोटिल भए।
फाइन लेगमा बल रोक्न डाइभ गर्दा लायनलाई चोट लागेको हो। डाइभपछि उनी बिस्तारै उठे र तुरुन्तै ड्रेसिङ रुमतर्फ इशारा गरे। लन्च ब्रेकअघि उनी बैसाखीको सहारामा स्क्यानका लागि एडिलेड ओभलबाट बाहिर गएको देखियो।
यसअघि चौथो दिन दिउँसो सत्रमा लायनले उत्कृष्ट बलिङ गर्दै तीन विकेट लिएका थिए, जसले अस्ट्रेलियालाई जित नजिक पुर्याएको थियो। यद्यपि पाँचौँ दिन चोट लाग्नुअघि उनले कुनै विकेट लिन सकेनन्।
चौथो दिन जैक क्रॉली र जो रुटको अर्धशतक
४३४ रनको लक्ष्य पछ्याउन उत्रिएको इङ्गल्याण्डको दोस्रो इनिङ्सको सुरुवात अत्यन्त खराब रह्यो। लन्चसम्म टोलीले १ विकेट गुमाएर मात्र ५ रन बनाएको थियो। त्यसपछि जैक क्रॉलीले १५१ बलमा ८५ रनको संघर्षपूर्ण पारी खेले। जो रुटले ६३ बलमा ३९ रन र ह्यारी ब्रूकले ५६ बलमा ३० रनको योगदान दिए।
यसअघि अस्ट्रेलियाले पहिलो इनिङ्समा ३७१ रन बनाएको थियो, जसको जवाफमा इंग्ल्यान्ड २८६ रनमा समेटिएको थियो। अस्ट्रेलियाले सिरिजका पहिलो दुई टेस्ट पहिले नै जितिसकेको थियो।
तेस्रो दिन ट्राभिस हेड डन ब्राडम्यानको विशेष क्लबमा
अस्ट्रेलियाली मैदानमा लगातार चार टेस्टमा शतक बनाउने खेलाडीहरूको विशेष क्लबमा ट्राभिस हेड सामेल भएका छन्। यस सूचीमा डन ब्राडम्यान, वैली ह्यामन्ड, माइकल क्लार्क र स्टिभ स्मिथजस्ता दिग्गजहरू छन्।
डन ब्राडम्यानले सन् १९२८ देखि १९३२ सम्म मेलबर्नमा यो उपलब्धि हासिल गरेका थिए भने वैली ह्यामन्डले सिड्नीमा लगातार चार टेस्टमा शतक बनाएका थिए। माइकल क्लार्क र अहिले ट्राभिस हेडले एडिलेड ओभलमा यो कीर्तिमान कायम गरेका हुन्।
