काठमाडौं । नेपाल प्रीमियर लिग (एनपीएल)को दोस्रो क्वालिफायरमा लुम्बिनी लायन्स र विराटनगर किङ्सले प्रतिस्पर्धा गरिरहेका छन् ।
कीर्तिपुरस्थित टियु मैदानमा जारी खेलमा लुम्बिनीले विराटनगरलाई १३५ रनको लक्ष्य दिएको छ । टस हारेर पहिले ब्याटिङ थालेको लुम्बिनीले २० ओभरमा ८ विकेट गुमाएर १३४ रन जोड्यो ।
उसका लागि डार्सी शर्टले ४५, रोहित पौडेलले ३४, निरोशन डिकवेलाले २९ रन जोड्दा अन्य ब्याट्सम्यान फ्लप सावित भए । रुवेन ट्रम्पलमान ११ रनमा अविजित रहँदा सन्दीप जोरा र जोनाथन स्मिथ शून्य रनमै आउट भए भने दिनेश अधिकारी र दिलिप नाथले एक रनमात्रै बनाउन सके ।
वलिङतर्फ विराटनगरका सुवास भण्डारी र प्रतिश जिसीले तीन-तीन तथा सन्दीप लामिछानेले दुई विकेट लिए ।
यो खेलको विजेताले उपाधिका लागि सुदूरपश्चिम रोयल्ससँग प्रतिस्पर्धा गर्नेछ । पहिलो क्वालिफायरमा विराटनगरलाई हराउँदै सुदूरपश्चिमले फाइनलमा स्थान बनाइसकेको छ । फाइनल खेल शनिबार हुनेछ ।
