काठमाडौँ । नेपाली काँग्रेसका केन्द्रीय सदस्य डा. शेखर कोइरालाले तत्कालीन सञ्चारमन्त्री तथा नेपाल सरकारका प्रवक्ता गोकुल बाँस्कोटाले ७० करोड घुसा मागेको टेप जस्ताको त्यस्तै सार्वजनिक भएर उनले राजिनामा दिइसकेको अवस्थामा पनि संसदमा सरकारका विरुद्धमा आफ्नो कुरा स्पष्टसँग राख्न नसकेको बताएका छन् । उनले भने– त्यो भन्दा ठूलो प्रमाण के हुन्छ, जसले रकमको अंक नै तोकेर मोल मोलाई गरिराखेका छन्, यस्तोमा पनि उनले राजिनामा दिएपछि मानौँ कि सबै दोष मेटिएजस्तो गरेर काँग्रेस चुप लागेर बस्नुले मुलुकको प्रमुख प्रतिपक्षी दलको दलको भूमिका निरीह र कमजोर भएको देखियो ।
त्यसमाथि छानबीन गरी दोषीमाथि कारबाहीको माग गरेर संसदमा काँग्रेसले सशक्त आवाजका साथ भूमिका निर्वाह गर्नुपथ्र्यो त्यसो गर्न सकेन जसले काँग्रेसका कार्यकर्ताहरुमा निराशा छाएको छ । रेडियो कान्तिपुरसँग आज बिहान कुराकानी गर्दै डा.कोइरालाले भने– त्यति ठूलो घुस प्रकारणमा काँग्रेस बोल्दैन, कुनै एकजना व्यक्तिका लागि संविधान संशोधन गर्न सरकार तयार हुन्छ त्यसमा पनि विपक्षी दल कहाँ छ खोज्नुपर्छ, देशमा बाँस्कोटा प्रकरणजस्ता ठूल्ठूला घुस काण्डहरु दिनदिनै भएको कुरा मिडिायामा आएका छन् त्यसमा पनि काँग्रेस बोल्दैन, अनि प्रतिपक्षी दल कहाँ खोज्ने कार्यकर्ताले ?
काँग्रेसको वर्तमान नेतृत्व कमजोर र व्यक्ति केन्द्रित भएको पनि उनले आरोप लगाए । उनले आफू कमजोर हुने डरले केन्द्रमा बसेर आफू अनुकुल विभाग गठन गर्ने र के के गर्ने काम सभापतिले गरेता पनि नेपाली काँग्रेस काठमाडौँमा नभएर जिल्ला र गाउँमा रहेको बताए । आफू अहिले देशव्यापी दौडाहामा रहेको र त्यसक्रममा देशैभरिका कार्यकर्ताले कस्लाई माग गर्छन् सोही बमोजिम कोइराला परिवारबाट एकजनाले सभापतिमा उम्मेदवारी दिने उनले बताए ।
आगामी महाधिवेशमा पनि यही नेतृत्व नै दोहोरिएलाजस्तो छ नि भन्ने प्रश्नमा उनले भने– त्यो तपाईँहरु काठमाडौँको मिडियाले भनेर हुदैन, काठमाडौँले भनेर हुदैन, किनभने काँग्रेस काठमाडौँमा बस्दैन गाउँ गाउँमा छ, गाउँले अर्कै भनिरहेको छ, उहीँ गएपछि मात्र त्यो थाहा हुन्छ ।
