काठमाडौँ । प्रधानमन्त्री सुशीला कार्कीले बाराको सिमरामा नेकपा एमालेका कार्यकर्ता र जेन–जी युवाहरुबीच भएको झडप जस्ता घटना स्वीकाय नहुने बताएकी छन् । बाराको सिमरामा उत्पन्न तनाव र हिंसात्मक गतिविधिप्रति टिप्पणी गर्दै प्रधानमन्त्री कार्कीले अराजक व्यवहार लोकतान्त्रिक प्रणालीमा स्वीकार्य नहुने बताएकी हुन् ।
प्रधानमन्त्री कार्कीले बुधबार साँझ सामाजिक सञ्जालमार्फत् प्रतिक्रिया सार्वजनिक गर्दै यस किसिमको अराजकता स्वीकार्य हुने बताएकी हुन् । उनले भनेकी छन्, ‘बाराको सिमरामा देखिएको तनाव र हिंसा अत्यन्तै दु:खद छ। म स्पष्ट पार्न चाहन्छु कि यस किसिमको अराजकता लोकतन्त्रमा कदापि स्वीकार्य छैन ।’
उनले युवाहरूको आक्रोश र राजनीतिक असन्तुष्टिलाई सरकारले गम्भीरतापूर्वक लिएको बताएकी छन् । तर अभिव्यक्ति स्वतन्त्रताको सम्मान राज्यको प्रतिबद्धता भएको उल्लेख गर्दै उनले सार्वजनिक सम्पत्तिको क्षति, विमानस्थलमा अवरोध सिर्जना गर्ने गतिविधि वा कानुन हातमा लिने क्रियाकलाप स्वीकार्य नहुने चेतावनी दिइन् ।
प्रधानमन्त्रीले गृह प्रशासन र सुरक्षा निकायलाई शान्ति र सुव्यवस्था कायम गर्न, राजनीतिक दलका नेताहरूको सुरक्षित आवागमन सुनिश्चित गर्न र निर्वाचनलाई निष्पक्ष तथा भयमुक्त बनाउन उच्च सतर्कता अपनाएर काम गर्न निर्देशन दिएकी छन् ।
उनले लोकतान्त्रिक प्रक्रियामार्फत मात्रै युवाहरूको अपेक्षा पूरा हुनसक्ने भन्दै सबै पक्षलाई अवाञ्छित राजनीतिक उत्तेजनाबाट टाढा रहन र लोकतान्त्रिक मार्गप्रतिको विश्वास कायम राख्न अपिल गरेकी छन् ।
जेनजी युवाहरुले एमालेका नेताहरुलाई अवरोध गर्ने प्रयासस्वरुप सिमरा क्षेत्रमा बुधबार प्रदर्शन गरेका थिए । सो क्रममा झडप हुँदा स्थानीय प्रशासनले कफ्र्यु नै जारी गरेको थियो ।
