काठमाडौं । नेकपा (एमाले)का नेता योगेश भट्टराईले आज सिमरामा भएको घटनाप्रति गम्भीर दुःख व्यक्त गर्दै मुलुकको शान्ति–सुरक्षाको अवस्थाप्रति प्रश्न उठाएका छन् ।
एमाले महासचिव शंकर पोखरेल सहभागी हुने पूर्वघोषित कार्यक्रमलाई लक्षित गर्दै गरिएको अवरोधपूर्ण गतिविधिले राजनीतिक सहिष्णुता र कानूनी अधिकारमाथि आघात पुगेको भट्टराईले टिप्पणी गरेका छन् ।
सामाजिक सञ्जालमार्फत प्रतिक्रिया दिंदै उनले देशको कुनै पनि स्थानमा स्वतन्त्र रूपमा हिँडडुल गर्न पाउने तथा शान्तिपूर्ण राजनीतिक गतिविधि सञ्चालन गर्न पाउने संवैधानिक अधिकारको सम्मान हुनुपर्ने बताएका छन् ।
भट्टराईले यस्ता घटनाले आसन्न निर्वाचन प्रक्रियामा नकारात्मक प्रभाव पार्नसक्ने बताउँदै सबै राजनीतिक शक्तिहरू सचेत हुनुपर्ने उल्लेख गरेका छन् ।
उनले शान्ति–सुव्यवस्था कायम राख्न सरकारको गम्भीर ध्यानाकर्षण गराउँदै भविष्यमा यस्ता घटना नदोहोरिन आवश्यक सुरक्षा पहल गर्न आग्रह गरेका छन् ।
उनले लेखेका छन्–
आज सिमरामा भएको घटनाप्रति दुःख व्यक्त गर्दछु । नेकपा एमाले महासचिव कमरेड शंकर पोखरेल सहभागि हुने पूर्व घोषित कार्यक्रम बिथोल्न गरिएको हर्कतले मुलुकको शान्ति सुरक्षामाथि गंभीर चिन्ता उत्पन्न गरेको छ । देशको एक ठाउबाट अर्को ठाउमा निर्विवाद हिडडुल गर्न पाउने तथा शान्तिपूर्ण राजनीतिक गतिविधि गर्न पाउने संविधान प्रदत्त अधिकारको सम्मान गर्न सबैमा अपिल गर्दछु ।
यस्ता गतिविधिले आसन्न निर्वाचनलाई थप अन्यौल र अनिश्चय तिर धकेल्ने कुरामा सचेत रहन र शान्ति सुव्यवस्था कायम राख्न सरकारको गंभीर ध्यानाकर्षण गर्दछु ।
