काठमाडौँ । इंग्लिस प्रिमियर लिग फुटबल अन्तर्गत म्यान्चेस्टर सिटीले जित निकालेको छ ।
गएराति भएको खेलमा सिटीले बर्नमाउथलाई ३–१ गोलले हराएको हो । घरेलु मैदानमा सिटीको जितमा एर्लिङ हालाण्डले दुई तथा निको ओ’रेलीले एक गोल गरे । बर्नमाउथका टेलर आडम्सले एक गोल फर्काए ।
१७ औं मिनेटमा हालाण्डले गोल गर्दै सिटीलाई सुरुवाती अग्रता दिलाएका थिए । २५ औं मिनेटमा आडम्सले गोल गर्दै बर्नमाउथलाई १–१ को बराबरीमा ल्याए ।
३३ औं मिनेटमा हालाण्डले गोल थप्दै सिटीलाई २–१ ले अघि बढाए । यता, ६० औं मिनेटमा ओ’रेलीले गोल गर्दै सिटीलाई ३–१ को जित दिलाए । जितसँगै सिटी १० खेलबाट १९ अंक जोड्दै तालिकाको दोस्रो स्थानमा उक्लिएको छ । बर्नमाउथ १८ अंकका साथ चौंथो स्थानमा छ ।
यस्तै, गएराति नै भएको अर्को खेलमा वेस्टहाम युनाइटेडले न्युक्यासल युनाइटेडलाई ३–१ गोलले हरायो । खेलको चौंथो मिनेटमा नै जाकोव मुर्फीको गोलबाट न्युक्यासलले सुरुवाती अग्रता लिएको थियो । ३५ औं मिनेटमा लुकास पाक्वेटाले गोल गर्दै घरेलु टोलिलाई १–१ को बराबरीमा ल्याए ।
यता, पहिलो हाफको इन्जुरी समयमा न्युक्यासलका स्भेन बोटम्यानले आत्मघाती गोल गरेपछि वेस्टहामले २–१ को अग्रता लियो । खेल सकिनै लाग्दा इन्जुरी समयमा थोमस सौसेकले गोल गर्दै वेस्टहामलाई ३–१ को जित दिलाए ।
यो नतिजापछि न्युक्यासल १० खेलबाट १२ अंकका साथ तालिकाको १३ औं स्थानमा छ भने वेस्टहाम ७ अंकका साथ १८ औं स्थानमा छ ।
