काठमाडौं । निवर्तमान प्रधानमन्त्री केपी शर्मा ओली र गृहमन्त्री रमेश लेखकलाई काठमाडौं उपत्यकाबाहिर जान नपाउने गरी तोकिएको स्थानहदविरुद्ध दायर रिट निवेदनमा सर्वोच्च अदालतले अन्तरिम आदेश दिन अस्वीकार गरेको छ ।
न्यायाधीश नृपध्वज निरौलाको इजलासले अन्तरिम आदेश नदिँदै उनीहरूलाई स्थानहद तोक्नुको कारण पेश गर्न सरकार र जाँचबुझ आयोगलाई आदेश जारी गरेको हो ।
अधिवक्ता डा. प्रेमराज सिलवालले ओली र लेखकमाथि तोकिएको स्थानहद कानुनविपरीत भएको दाबी गर्दै सर्वोच्चमा रिट दर्ता गरेका थिए ।
जेन–जी आन्दोलनमा भएको दमन र त्यसपछिको आगजनी घटनाबारे छानबिन गर्न गठित आयोगको सिफारिसमा सरकारले ओली, लेखक र तत्कालीन काठमाडौं प्रमुख जिल्ला अधिकारी छविराज रिजाललाई अनुमतीविना उपत्यका छाड्न नपाउने निर्णय गरेको थियो ।
त्यसैगरी तत्कालीन गृहसचिव गोकर्णमणि दुवाडीमाथि पनि स्थानहद तोकिए पनि सरकारी कामकाजका कारण उनीमाथिको प्रतिबन्ध फुकुवा गरिएको सरकारको भनाइ छ ।
