काठमाडौँ । ग्लोबल टि–२० छनोटका लागि आजदेखि बन्द प्रशिक्षण सुरु भएको छ । बन्द प्रशिक्षणको पहिलो दिन आज १४ खेलाडी उपस्थि भएका छन् । नेपाल क्रिकेट सङ्घ (क्यान) र खेलाडीबीचको विवाद समाधान भएपछि बन्द प्रशिक्षण सुरु भएको बताइएको छ । मुख्य प्रशिक्षक पुबुदु दसानायकेले आजै खेलाडी र क्यानबीच विवाद समाधान भएको जानकारी दिनुभयो ।
प्रशिक्षणमा मोहम्मद आरिफ शेख, शरद भेषावकर, कुशल मल्ल, मोहम्मद आशिफ शेख, पवन सर्राफ, साहब आलम, भीम सार्की, प्रदीप ऐरी, गुलशनकुमार झा, जितेन्द्र मुखिया, विवेककुमार यादव, सौरभ खनाल, राजेश पुलामी मगर र किशोर महतो सहभागी छन् ।
मुख्य प्रशिक्षक दसानायकेका अनुसार बन्द प्रशिक्षणमा अन्य ९ खेलाडी आजै बेलुकासम्ममा जम्मा भइसक्ने छन् । ती खेलाडीमा क्यानले कारवाही गरेका चार खेलाडी पनि रहनेछन् । क्यानले ज्ञानेन्द्र मल्ल, दीपेन्द्रसिंह ऐरी, सोमपाल कामी र कमलसिंह ऐरीलाई कारवाही गरेको थियो ।
कप्तान सन्दीप लामिछाने बिग बास लिग खेल्न अहिले अस्ट्रेलियामा रहेका छन् भने केही खेलाडी अस्वस्थ रहेको बुझिएको छ ।
