काठमाडौँ । देशै बन्दाबन्दीमा परेको महिना दिन पुग्न आँट्यो । त्यसो त संसार नै एक किसीमको लकडाउनमै छ । सारा मानिसहरु घरभित्रै थुनिएका छन् । नेपालमा पनि मानिस घरभित्र थुनिएको आज २७ दिन पूरा भयो । यसैले मानिस नै खान नपाएर प्याकप्याकी पर्ने अवस्था देखिँदैछ । सहरमा खान नपाएरै बस्न नसकेर आफ्नो गाउँघर फर्किने विपन्न तथा निमुखा मजदुरहरुको ताँतीले सारा देशबासीकै मन खिन्न बनाएको छ । आफ्ना लालाबाला बोकेर दिनहुँ बाटो हिँडीरहेका तस्बिरहरु दिनहूँ आइरहेकै छन् । यो सबै मानिसको पेट पाल्नका लागि भए गरेका बाध्यताहरु हुन् ।
यहाँ उठाउन खोजिएको भोकको प्रसंग भने मानिसको होइन जनावरको हो । सहरबजारका जनावरहरुले खानेकुरा मानिसका क्रियाकलापबाट पाउने हुन् । अहिले मानिस घरभित्रै थुनिएकोले सडकका जनावरले भोकाएको व्यपवहार देखाएका छन् । भोकाए पनि होलान् । अहिले पशुपतिनाथमा दर्शनार्थी जाँदैनन् । नत यहाँका साधुसन्तहरुले नै भोजन गर्ने गरेका छन् । जसका कारण यहाँका बाँदर भोकाएका छन् । उनीहरुका खाना पनि भक्तजन र साधुसन्तबाट पाउने हुन् । तर अहिले आर्यघाटसहित पाशुपत क्षेत्र नै सुनसा नबनेपछि विलखबन्दमा परेका छन् यहाँका बाँदर । यो तस्बिरमा देखिएका कुकूरले पनि यी ट्राफिक प्रहरीको पिछा भोक लागेरै गरेको स्पष्ट देखिन्छ । सडकमा सन्नाटा छ । कतै मानिस देख्दैनन् । एकाध सवारी साधन देखिन्छन् तर ती पनि घुइँकीमात्र रहेका हुन्छन् । त्यसैले कतै केही खान पाइन्छ कि भनेर यी कुकूरहरु ती प्रहरीका पछि लागेका छन् ।
यसरी हेर्दा लाग्छ कोरोनाले मानिसको रोगको मात्र नभएर हरेक प्रकृतिको परीक्षण गरिरहेको छ । महामारीले मानिसको व्यवहार, मन र भावनाको पनि परीक्षण गरिरहेको जस्तो लाग्दछ । मानिस प्रकृतिभन्दा माथि या शक्तिशाली छैन भन्ने त यो अदृश्य जिवाणुले सिकाएकै छ । किनभने चन्द्रमामा बस्ती बसाल्ने तयारी गरिरहेको भनिएका विश्वका ठूला देशहरुले पनि एउटा जीवाणुको औषधि निकाल्न नसकेबाट यो प्रमाणि भएकै छ । साथै प्रकृतिले मानिसमात्र नभएर जनावरको पनि आत्मा हुन्छ, मानिसलाई मात्र नभएर जनावरलाई पनि भोक प्यास लाग्छ र यो प्रकृतिले निरन्तरता पाउन मानिसमात्र नभएर उनीहरु पनि बाँच्न पाउनुपर्छ भन्ने सन्देश पनि दिन खोजेको छ । यो अदृश्य परीक्षाले दिएको सुषुप्त सन्देश पनि बुझौँ र आफूले मात्र खाएर हुदैन जनावरलाई पनि बाँच्नका लागि खान दिउँ ।
