सुदूरपश्चिम। गत मङ्गलबारको प्रदर्शनका क्रममा भएको आगजनीबाट ध्वस्त बनेपछि अवरुद्ध भएको जिल्ला प्रशासन कार्यालय कैलालीको सेवा आजदेखि आंशिक रूपमा सुरु भएको छ ।
भवनको एक कोठा सरसफाइ गरेर आज सेवा लिन आएका एक व्यक्तिलाई नागरिकता प्रमाणपत्र उपलब्ध गराएर सेवा सुरु गरिएको कार्यालयका प्रवक्ता शिवराज जोशीले जानकारी दिनुभयो । अन्य नियमित सेवा पनि क्रमशः सञ्चालन गर्ने प्रयास भइरहेको उहाँले बताउनुभयो ।
आगजनीबाट जिन्सी समान र अन्य महत्त्वपूर्ण कागजात जलेर नष्ट भएपछि जिल्ला प्रशासन कार्यालयलाई धनगढीको स्थानीय एरिष्टो इङ्गलिस स्कुल र सुदूरपश्चिमाञ्चल एकेडेमी (एसपिए)ले कम्प्युटर, प्रिन्टर, कुर्सीलगायत सामग्री सहयोग गरेका छन् ।
प्रदर्शनका क्रममा कार्यालयबाट चोरी भएकामध्ये कतिपय जिन्सी समान प्रहरीले चोरी गरी लुकाई राखिएको अवस्थामा बरामद गरी आज कार्यालयमा बुझाएको छ ।
यसैगरी कैलाली भन्सार कार्यालयले पनि आजदेखि सेवा सुरु गरेको छ । कार्यालय परिसरमै रहेको गाडी पार्किङ गरिने भवनबाट सेवा सञ्चालन गरिएको छ । प्रदेश सरकारका मन्त्रालय र मातहतका कार्यालयमा भने सेवा सञ्चालन गर्न अझै समय लाग्ने जनाइएको छ । मन्त्रालयका कोठा र परिसरमा अझै पनि सरसफाइ भएको छैन । केही युवाले कतिपय कार्यालयमा सरसफाइ गरेका छन् ।
एकसय ३७ भौतिक संरचनामा क्षति
प्रदर्शनका क्रममा कैलालीका सरकारी र निजी गरी एक सय ३७ कार्यालय तथा निजी घरमा क्षति भएको छ । आगजनी तथा तोडफोडले अधिकांश संरचनामा पूर्ण क्षति पुगेको छ ।
एक सय तीन सरकारी कार्यालय, १२ निजी घर, पाँच प्रहरी बिट, राजनीतिक दलका १७ वटा कार्यालयमा आगजनी र तोडफोड भएको जिल्ला प्रहरी कार्यालयका प्रमुख प्रहरी उपरीक्षक नरेन्द्र चन्दले जानकारी दिनुभयो ।
प्रदर्शनका क्रममा एक सय १४ चारपाङ्ग्रे सवारीसाधन, ५४१ मोटरसाइकल, तीन साइकल र छ वटा तीन पाङ्ग्रे सवारीसाधन जलेर नष्ट भएका छन् । विभिन्न कार्यालय परिसरमा राखिएको अवस्थामा सवारीसाधनमा आगजनी गरिएको थियो । प्रहरी उपरीक्षक चन्दले विस्तृत अध्ययनको काम बाँकी रहेको बताउनुभयो ।
प्रदर्शनका क्रममा कैलालीको धनगढी, अत्तरिया, लम्कीचुहा, गौरीगङ्गा, टीकापुर, सुख्खडलगायत ठाउँका सरकारी कार्यालय, निजी घरमा तोडफोड र आगजनी भएको थियो । रासस
