काठमाडौँ । नेकपा (एमाले)ले हालको असामान्य परिस्थितिप्रति चिन्ता व्यक्त गर्दै भदौ २३ र २४ का घटनामा भएको जनधनको क्षतिप्रति दुःख प्रकट गरेको छ ।
सो पार्टीले तोडफोड, आगजनी, लुटपाट र व्यापक विनाशका दोषी पहिचान गरी कडा कानुनी कारबाही गर्न माग पनि गरेको छ ।
महासचिव शंकर पोखरेलले बिहीबार विज्ञप्ति जारी गर्दै सामाजिक सञ्जालको स्वतन्त्रता, सुशासन र भ्रष्टाचारविरुद्धको माग राख्दै शान्तिपूर्ण प्रदर्शनमा निस्किएका युवामध्ये ज्यान गुमाएकाप्रति श्रद्धाञ्जली अर्पण गर्दै घाइतेको उपचार र पीडित परिवारको सहानुभूति प्रकट गरेका छन् ।
देशव्यापी तोडफोड र आगजनीले ऐतिहासिक सरकारी संरचना, संवैधानिक निकाय, मिडिया हाउस, निजी व्यवसाय र सार्वजनिक सम्पत्तिलाई ठूलो क्षति पुर्याएको एमालेको ठहर छ ।
यस्तै। विनाशकारी गतिविधिमा कसरी संलग्नता भयो भन्ने सत्यतथ्य छानबिन गर्न, योजनाकार र अपराधीलाई कानुनी दायरामा ल्याउन र सुरक्षा निकायको भूमिकामाथि समीक्षा गर्न एमालेले माग गरेको छ ।
प्रधानमन्त्रीको राजीनामापछि राजनीतिक निकास संविधान र लोकतान्त्रिक प्रक्रियाबाटै खोजिनुपर्ने उल्लेख गर्दै एमालेले सुशासन, नातावाद अन्त्य, रोजगारी र विकासमा केन्द्रित समाधानको आवश्यकता औंल्याएको छ ।
एमालेले संघीय संसद, न्यायपालिका, प्रदेश र स्थानीय सरकारलाई लोकतन्त्र र सेवाप्रवाहको रक्षा गर्न आग्रह गरेको छ । साथै, तोडफोड र लुटपाट रोक्न नेपाली सेना लगायत सुरक्षा निकायको सक्रियता बढाउन आह्वान गरेको छ ।
पार्टीले परिस्थिती सामान्य भएपछि बैठक बसेर समग्र अवस्थाको समीक्षा र आगामी रणनीति तय गर्ने जनाएको छ । कार्यकर्ता र समर्थकलाई उच्च मनोबल राखी एकताबद्ध भई सामाजिक सद्भाव र सहयोगमा अग्रसर हुन पनि एमालेले आह्वान गरेको छ ।
