काठमाडौँ
प्रधानमन्त्री केपी ओली केही दिनयता आफ्नो सरकारी निवास बालुवाटार बोलाएरै संवैधानिक निकायका प्रमुखहरु भेट्न व्यस्त छन् । तर उनले सबैजना संवैधानिक प्रमुखलाई भेटेका छैनन् । उनी अर्थपूर्ण रुपमा केही यस्ता पदाधिकारी भेट्दैछन् कि तिनीहरु अहिलेको सत्तारुढ दल नेकपाको शक्ति संघर्ष एवं विवादसँग प्रत्यक्ष रुपमा जोडिएका छन् । यो हेर्दा लाग्छ सत्तारुढ नेकपाकै नेताहरुले प्रधानमन्त्रीको राजीनामा मागिरहँदा उनी राजीनामा दिने नभएर अरु नै त्यस्तै अर्थपूर्ण कदम चाल्दैछन् भन्ने स्पष्ट भान हुन्छ । र यी भेटघाटहरुबाट पनि प्रधानमन्त्री गम्भीर राजनीतिक तथा अन्य कानुनी परामर्शमा व्यस्त छन् र त्यसले सत्ताबाट उनको बहिर्गमन नभएर सत्तामै बसिरहन तथा आफ्नै दलका विपक्षीहरुलाई कमजोर बनाउने खालका खेलमा उनी व्यस्त छन् भन्ने स्पष्ट सन्देश दिएका छन् ।
प्रधानमन्त्री केपी शर्मा ओलीले अचानक मध्यराती अख्तियार दुरुपयोग अनुसन्धान आयोगका प्रमुखसँग भेटघाट गरेका छन् । ओलीले अख्तियार प्रमुखसँग शुक्रबार राति भेटघाट गरेका हुन् । भेटका लागि प्रमुख नविन घिमिरे शुक्रबार राति साढे नौ बजे बालुवाटार पुगेका थिए । प्रधानमन्त्री ओलीले ३ दिनमात्र अघि प्रधानन्यायाधीश चोलेन्द्र समशेर राणासँग भेटघाट गरेका थिए । उनले राणालाई पनि प्रधानमन्त्री निवास बालुवाटारमै बोलाएर राति १० बजेतिर नै भेटघाट गरेका हुन् ।
सत्तारुढ दल नेकपाभित्रको आन्तरिक किचलोका कारण घेराबन्दीमा परेका ओलीले संवैधानिक अंगका प्रमुखहरुलाई यसरी भेटघाट गर्नुले धेरैमा संका जन्माएको छ । नेकपाभित्र र बाहिर अहिले धेरै विषयमा चर्चा गरिन्छ । ललिता निबासको जग्गा प्रकरण अहिले फेरि उठेको छ । त्यसैगरी माओवादीका तत्कालीन लडाकुको शिविरमा भएको आर्थिक अनियमिताको बारेमा अख्तियारले छानबिन गर्नुपर्ने कुरा पनि अहिले आएर उठाइएको छ । त्यस अनियमिततामा प्रचण्डलगायत माओवादीका नेताहरुलाई दोषी देखाउने गरिएको छ । त्यस्तै यतिखेरै द्धन्द्धकालीन गम्भीर प्रकृतिका अपराधलाई क्षमा दिन नसकिने फैसला पनि सर्वाेच्चबाट आएको छ ।
अर्काेतर्फ पार्टीले उहाँलाई सत्ताबाट निकाल्नेगरी क्रियाकलाप गरेमा प्रधानमन्त्री ओलीले देशमा संकटकाल लगाउन सक्ने अनुमान पनि धेरैले गरेका छन् । यस विषयका चर्चाहरु पनि बेला बेलामा उठ्ने गरेकै छन् । यस्तो बेलामा यी सबै विषयमा प्रत्यक्ष रुपमा जोडिने अख्तियारका प्रमुख आयुक्त तथा प्रधानन्यायाधीशसँगको भेटघाटले नेपाली राजनीतिक वृत्तमा नयाँ तरंग उत्पन्न गर्न खोजेजस्तो देखिँदैछ ।
यसलाई नेकपाभित्रको पूर्व माओवादी खेमाले अझ बढी मात्रामा प्रधानमन्त्रीले रातारात यसरी संवैधानिक प्रमुखहरुलाई किन भेट्दैछन् भनेर तर्सिएका छन् । कतिपयले यसलाई छोरी कुटेर बुहारी तर्साउने उनको खेल त होइन भन्ने प्रश्न पनि गरेका छन् ।
