काठमडौ । स्थानीय निकायका अनेक तरहका कानुन तथा आदेशहरु आउने गरेका छन् जसले उनीहरुको स्तर मात्र देखाउँदैन त्यस तहका जनप्रतिनिधिको लहड पनि प्रष्ट्याउँछ । त्यसको पछिल्लो उदाहरण आज भेटिएको छ सिन्धुपाल्चोकको भोटेकोशी गाउँपालिकाको । उक्त गाउँपालिकाले आज यस्तो सूचना जारी गरेको छ कि त्यो देख्दा जोकोही पनि नहाँसी बस्न सक्दैन । सूचना त जुवातास नखेल्नु भन्ने नै हो तर पनि लेखाईको भाषाले उक्त गाउँपालिकाको स्तर देखाएको छ र यस्तो प्रस्तुतिले सबैलाई हसाएको छ । 
जुवातास खेल्दा हातमा रहेका तासका पत्तीहरु फिट्नुपर्छ र यसरी पत्ती फिट्दा मुखमा हात लगेर थुक पनि लगाउनुपर्ने हुन्छ । यसरी हातहरु बारम्बार मुखमा लैजाँदा कोरोना सर्ने भएकोले तास नै नखेल्नु भन्ने आदेश यस गाउँपालिका वासिन्दालाई दिएको छ । उक्त गाउँपालिका १ का बासिन्दाका नाममा यो सूचना जारी गरिएको छ ।
सूचनामा अर्काे पनि बडो ठट्यौलो कुरा के छ भने यदि यसरी तास खेलेको पाइएमा र कोरोना संक्रमण भएको पाइएमा गृह मन्त्रालयको कानुनबमोजिम कारबाही हुनेछ भनिएको छ । स्थानीय तहका अधिकारीले यसरी जारी गर्ने सार्वजनिक सूचनामा कोरोना संक्रमण भएको पाइएमा गृह मन्त्रालयलको कानुन बमोजिम कारबाही हुनेछ भनेर लेख्न हुने हो कि होइन भन्ने कुरा त्यस तहका अधिकारीलाई थाहा नभएजस्तो देखिन्छ ।
