काठमाडौं । कोरोना भाइरस (कोभिड–१९) को संक्रमण विश्वभर फैलिएसँगै त्यहाँ रहेका नेपालीहरुले स्वदेश फर्किने इच्छा देखाएका छन् । सरकारले त्यसलाई अध्ययन गरिरहेको भन्दै अहिलेसम्म करिव ६ लाख नेपाली स्वदेश फर्किने तयारीमा रहेको परराष्ट्र मन्त्रालयले जानकारी दिएको छ ।
नेपालका दूतावासहरु, गैरआवासीय नेपाली संघ, लगायतका संयन्त्रहरुमार्फत संकलन गरिएको तथ्यांकअनुसार झण्डै ६ लाख स्वदेश फर्किन चाहेको परराष्ट्रमन्त्री प्रदीप ज्ञवालीले जानकारी दिएका छन् । सोमबार राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिको बैठकमा मन्त्री ज्ञवालीले सो जानकारी गराएका हुन् । उनले युएईले नेपाली फिर्ता पठाउनका लागि विमान ल्याउने अनुमति समेत माग गरेको बताए ।
‘भारतबाट २ लाख ५० हजार र भारत बाहेकका मुलुकबाट ३ लाख २३ हजार ५३० नेपाल फर्किन चाहिरहेको तथ्यांक संकलन भएको छ’, उनले भने । त्यसमध्ये पनि २ लाख १० हजार नेपालीलाई तत्काल स्वदेश ल्याउनुपर्ने देखिएको छ । मन्त्री ज्ञवालीले भारतले रेल संचालन गर्ने निर्णय गरेसँगै त्यसको गम्भिर असर नेपालमा पर्ने समेत स्पष्ट पारे । खुला सीमाका कारण अहिले पनि लुकिछिपी नेपालीहरु घर फर्किएका छन् । र, उनीहरुमा कोरोना संक्रमण पनि देखिएको छ ।
