काठमाडौँ । प्रधानमन्त्री केपी शर्मा ओलीले तीन दिनभित्र रासयनिक मलको प्रभावकारी वितरणको ठोस प्रश्तावसहित उपस्थित हुन कृषि, तथा पशुपंक्षी विकासमन्त्रीलाई निर्देशन दिनुभएको छ ।

रासयनिक मलको अभाव भएको गुनासोबारे प्रधानमन्त्री केपी शर्मा ओलीले सिंहदरबारमा मंगलवार कृषिमन्त्री रामनाथ अधिकारी र उद्योग, वाणिज्य तथा आपूर्तिमन्त्री दामोदर भण्डारीसँग छलफल गर्नुभएको हो ।

रासयनिक मलको उपलब्धता, आपूर्तिको विषय गहन छलफल भएको बताउनु भयो । यथेष्ठ मात्रामा जति रासयनिक मल हुनुपर्ने थियो, त्यो किन हुन सकेन ? भन्दै प्रश्न गर्नुभयो । प्रधानमन्त्री ओलीको भनाइ उद्धृत गर्दै उद्योग,  वाणिज्य तथा आपूर्तिमन्त्री दामोदर भण्डारीले यथेष्ठ मात्रामा मल उपलब्ध नभएको र प्रभावकारी वितरण किन हुन नसकेको सो अब प्रभावकारी वितरण गर्ने ठोस प्रश्तावसहित उपस्थित हुन तीन दिनको समय दिनुभएको जानकारी दिनुभयो ।  उहाँले रासयनिक मल अहिले पनि उपलब्ध रहेको र आयात पनि भइरहेको बताउनु भयो । वितरण प्रभावकारी हुन नसेककोबारे प्रधानमन्त्रीको चासो छ ।

मन्त्री भण्डारीले भन्नुभयो, ‘आज सम्माननीय प्रधानमन्त्रीज्युको उपस्थितिमा कृषि मन्त्रालय र उद्योग, वाणिज्य तथा आपूर्ति मन्त्रालयसँग अहिलेको रासयनिक मलको उपलब्धता, आपूर्तिको विषयलाई लिएर छलफल भएको छ । यथेष्ठ मात्रामा जति रासयनिक मल हुनुपर्ने थियो, त्यो किन हुन सकेन ? भनेर प्रधानमन्त्रीज्युले गम्भीरतापूर्वक चासो राख्नुभएको छ । यद्यपि अहिले पनि रासयनिक मल उपलब्ध छ । आयात पनि भइरहेको छ । त्यसलाई वितरण जसरी हुनुपर्ने हो त्यसरी हुन सकेन । समग्र विषयलाई तीन दिनभित्र ठोस प्रश्तावसहित आउन कृषि मन्त्रालयलाई निर्देश भएको छ । नेपालमा मल कारखानाका लागि आवश्यक तयारीका लागि उद्योग मन्त्रालयलाई निर्देश भएको छ ।’

प्रधानमन्त्री ओलीले नेपालमा मल कारखानाका लागि आवश्यक तयारी गर्न उद्योग, वाणिज्य तथा आपूर्ति मन्त्रालयलाई निर्देशन दिनुभएको पनि मन्त्री भण्डारीले बताउनु भयो ।