काठमाडौं । अमेरिका भ्रमण गर्दा भिसा आवेदन शुल्कमा थप २५० डलर तिर्नुपर्ने भएको छ । अमेरिकाले नयाँ ‘भिसा इन्टेग्रिटी कर’ तिर्नुपर्ने व्यवस्था गरेको हो ।
यो नयाँ कर ट्रम्प प्रशासनको हालै पारित भएको घरेलु नीति विधेयकको एक प्रावधान अनुसार लगाउन लागिएको हो ।
यो कर अमेरिकामा प्रवेश गर्ने गैरआप्रवासी भिसा प्राप्त गर्ने सबै व्यक्तिलाई लागु हुनेछ ।
यो प्रावधान पर्यटक र व्यवसायिक यात्रु, अन्तर्राष्ट्रिय विद्यार्थी र अन्य अस्थायी आगन्तुकलाई समेत लागू हुने छ ।
अमेरिकी विदेश मन्त्रालयलको तथ्यांकअनुसार सन् २०२४ मा अमेरिकाले करिब १ करोड १० लाख गैरआप्रवासी भिसा जारी गरेको थियो ।
यसमा भिसा छुट कार्यक्रममा समावेश भएका देश, जस्तै अस्ट्रेलिया र धेरै युरोपेली देशका पर्यटक र व्यवसायिक यात्रुलाई ९० दिन वा त्यसभन्दा कम समयको बसाइका लागि भिसा आवश्यक नपर्ने बताइएको छ ।
भिसा जारी गर्दा यो शुल्क तिर्नुपर्ने र कुनै पनि मिनाहा नहुने बताइएको छ । भिसाको सर्तहरू पालना गर्ने यात्रुले यात्रा समाप्त भएपछि यो शुल्क फिर्ता पाउनसक्ने बताइएको छ ।
