काठमाडौँ । गृहमन्त्री रमेश लेखकले विपद्जन्य क्षति हुनबाट रोक्न र विपद्पछि नागरिक र सम्पत्तिको सुरक्षा गर्न सरकार तयारी अवस्थामा रहेको बताउनुभएको छ ।
मंगलवार सिंहदरबारमा विपद् प्रतिकार्यमा हवाई उद्धारका लागि निजी हेलिकप्टर प्रयोग सम्बन्धमा वायुसेवा सञ्चालक संघ र विपद् जोखिम न्युनिकरण तथा व्यवस्थापन प्राधिकरणबीच भएको सम्झौतापछि बोल्दै उहाँले यस्तो बताउनुभएको हो । नेपालमा विपद्को जोखिम उच्च रहेको र अहिले मनसुनको प्रारम्भिक चरणमा रहेको बताउनु भयो । उहाँले नेपालमा मनसुनजन्य विपद्ले धेरै ठूलो जनधनको क्षति हुने गरेको बताउनु भयो । काठमाडौं उपत्यकाभित्र कुनैपनि ठाउँमा जोखिम उत्पन्न भए वायुसेवा सञ्चालक संघले हेलिकप्टरबाट निःशुल्क उद्धार गर्ने सम्झौता भएको बताउनु भयो ।
गृहमन्त्री लेखकले भन्नुभयो, ‘हामी कहाँ विपद्को जोखिम उच्च रहन्छ । अहिले हामी मनसुनको प्रारम्भिक चरणमा छौँ । मनसुनजन्य विपद्ले धेरै ठूलो जनधनको क्षति हुने गरेको छ । हाम्रो विगतको हाम्रा विगतका अनुभवले पनि के देखाएको छ भने धेरै ठूलो क्षतिबाट नागरिकको, सम्पतीको सुरक्षा गर्न हामी तयारी अवस्थामा बस्नुपर्ने हुन्छ । आज जुन एमओयु गरिएको छ, यसले महत्वपूर्ण काम भएको छ । काठमाडौं उपत्यकाभित्र कुनैपनि ठाउँमा जोखिम उत्पन्न भयो र नागरिकको सेवा गर्नुपर्ने भयो भने वायुसेवा सञ्चालक संघले हेलिकप्टरबाट निःशुल्क उद्धार गर्नेकुरा गर्नुभएको छ, यो अत्यन्त महत्वपूर्ण काम भएको छ । तपाईंहरुले ठूलो सार्वजनिक दायित्व निर्वाह गर्ने काम गर्नुभएको छ ।’
सरकार र वायु सेवा सञ्चालक संघबीच काठमाडौं उपत्यकामा विपद्जन्य जोखिम उत्पन्न भए निःशुल्क उद्धार गर्ने सम्झौता भएको हो । उपत्यका बाहिर भने वायुसेवा सञ्चालकहरुले आवश्यक परेको खण्डमा अपरेशन कस्ट लिएर उद्धार गर्ने समझदारी भएको छ । खोज र उद्धारमा संलग्न हुने नेपाली सेना, नेपाल प्रहरी, सशस्त्र प्रहरी बल, नेपाललाई गृह मन्त्रालयले व्यवस्थापन गर्ने बताउनु भयो ।
