काठमाडौं । विराटनगरस्थित नोबेल मेडिकल कलेजमा तोडफोड भएको छ ।
अतिरिक्त शुल्क नबुझाउने विद्यार्थीलाई प्रवेश नदिई थोरै विद्यार्थीलाई मात्रै लिएर कक्षा सुरू भएको भन्दै आक्रोशित विद्यार्थीहरुले आइतबार तोडफोड गरेका हुन् ।
विवाद साम्य नहुन्जेल कक्षा रोक्ने सहमतिविपरीत नोबेलले कक्षा चलाएपछि एमबिबिएस प्रथम वर्षका विद्यार्थीहरू आन्दोलनमा उत्रिएका थिए ।
आन्दोलनमा उत्रिएका विद्यार्थीहरुलाई साथ दिन पुगेका विद्यार्थी संगठनका नेताहरूले नोबेल कलेजमा तोडफोड गरेका हुन् ।
अहिले नोबेल परिसर तनावग्रस्त बनेको छ। तोडफोडको क्रममा केही विद्यार्थी घाइतेसमेत भएका छन् ।
नोबेलले गत बिहीबार स्थानीय प्रशासनसँग कुनै पनि अतिरिक्त शुल्क नलिने, विवाद साम्य नभएसम्म कक्षा नचलाउने सहमति गरेको थियो। तर, सहमति विपरित कक्षा संचालन भएपछि विद्यार्थीहरु विरोधमा उत्रिएका हुन् ।
