काठमाडौं । धनकुटाको महालक्ष्मी नगरपालिकाले अनौठो सूचना जारी गरेर धेरैलाई चकित पारेको छ । देशभरी नै निजी विद्यालयप्रति विद्यार्थीको आकर्षण बढिरहेका बेला महालक्ष्मी नगरपालिकाले भने भएका निजी विद्यालय नै बन्द गरेर पालिकाभित्रका बालबालिकालाई अन्य पालिकाका निजी विद्यालयमा पढ्न जानबाट बञ्चित गरेको छ ।
महालक्ष्मी नगरपालिकाले सार्वजनिक सूचना जारी गरेर निजी विद्यालयका सवारी साधनलाई प्रवेशमा रोक लगाएको हो । सामुदायिक विद्यालयको शैक्षिक गुणस्तर सुधार गर्ने भन्दै पालिकाभित्रका बालबालिकालाई अन्य पालिकामा भएका निजी विद्यालयमा जान नपाउने गरी सवारी साधन प्रवेशमा रोक लगाएको हो ।
सामुदायिक विद्यालयको शैक्षिक गुणस्तर सुधार र बालबालिकालाई सुलभ तथा गुणस्तरीय शिक्षा उपलब्ध गराउने उद्देश्यले निजी विद्यालयका सवारी साधनलाई पालिका प्रवेश गर्न नदिने गरी रोक लगाउने निर्णय नगरप्रमुख ध्रुवराज रायाले गरेका हुन् । उनले अभिभावक तथा सरोकारवालाहरूसँगको छलफल र समन्वयबाटै यो निर्णय गरिएको दाबी गरेका छन् ।
नगरप्रमुख रायाले नगरभित्रका निजी विद्यालयसमेत बन्द गरिएको उल्लेख गरेका छन् ।
नगरपालिकाले जारी गरेको सूचनामा भनिएको छ, ‘शैक्षिक सत्र २०८२ मा अन्य पालिका र नगरपालिकाबाट निजी विद्यालयका सवारी साधन प्रवेश गरेको गुनासो बढेपछि बन्देज गरिएको छ ।’
महालक्ष्मी नगरपालिका क्षेत्रभित्र लेगुवा बजारमा मात्र निजी विद्यालय सञ्चालनमा रहेको पालिकाले जनाएको छ । पालिका आफैंले भने निजी विद्यालय बन्द गरिसकेको र छिमेकी पालिकामा सञ्चालनमा रहेका निजी विद्यालयहरूले विद्यार्थी ओसारपसार गर्ने क्रम बढेपछि त्यसलाई समेत बन्देज गरिएको प्रमुख रायाले जानकारी दिएका छन् ।
उनका अनुसार, दुई वर्षको अवधिमा महालक्ष्मीभित्रका तीनवटा विद्यालय बन्द गराइएको छ । लेगुवामा रहेको एउटा निजी विद्यालयलाई समेत बन्द गर्ने अन्तिम तयारीमा पुगेको छ ।
धनकुटा नगरपालिकामा अहिले ४७ वटा सामुदायिक विद्यालय सञ्चालनमा छन । ती सामुदायिक विद्यालयको सुधारका लागि नगरपालिकाले समेत अभियानका रूपमा निर्णयहरू गरेर अंग्रेजी माध्यम, डिजिटल डिस्प्ले बोर्ड, आइटी ल्याब लगायतका कार्यक्रमहरू सञ्चालन गरेको जनाएको छ ।
नगरपालिकाले गरेको निर्णयलाई अनौठो मानिएको छ । बालबालिकालाई सामुदायिक वा निजी जहाँ पठाए पनि त्यो छुट अभिभावकलाई हुन्छ । तर नगरपालिकाभित्र निजी सवारी साधन प्रवेश नै गर्न नदिने नगरप्रमुखको निर्णयको आलोचना हुन थालेको छ ।
