काठमाडौँ । इन्डियन प्रिमियर लिग (आईपीएल) अन्तर्गत कोलकाता नाइट राइडर्स (केकेआर)ले अलराउन्ड प्रदर्शनले राजस्थान रोयल्स (आरआर)लाई आठ विकेटले पराजित गर्दै प्रतियोगितामा पहिलो जित हात पारेको छ ।
गुवाहाटीको बार्सपारा क्रिकेट रंगशालामा बुधबार भएको खेलमा टस हारेर पहिले ब्याटिङ गरेको राजस्थान रोयल्सले २० ओभरमा ९ विकेट गुमाएर १५१ रन बनाएको थियो । जवाफमा कोलकाता नाइट राइडर्सले १७.३ ओभरमा दुई विकेट गुमाएर १५३ रन बनाएर खेल जित्यो ।
१५२ रनको लक्ष्य पछ्याएको केकेआरलाई मोइन अली र क्विन्टन डी ककले उत्कृष्ट सुरुवात गरेका थिए । यी दुईबीच पहिलो विकेटका लागि ४१ रनको साझेदारी भएको थियो । अलीलाई महिश तिक्षाणाले रनआउट गराए । यसपछि डि ककले कप्तान अजिंक्य रहाणेको साथ पाए । दुवैले २४ बलमा २९ रन जोडे ।
११ औं ओभरको पहिलो बलमा रहाणेलाई तुषार देशपाण्डेले वानिन्दु हसरङ्गाबाट क्याच आउट पारे । उनी १५ बलमा १८ रन बनाएर आउट भए । यसपछि विकेटकिपर ब्याट्सम्यान डी ककले प्रभावशाली खेलाडीका रुपमा आएका अङ्क्रिश रघुवंशीको साथ पाए ।
दुवैले ८३ रनको अविजित साझेदारी गर्दै टोलीलाई जित दिलाए । यस खेलमा डी कक ९७ रनमा अविजित रहे भने रघुवंशी २२ रनमा अविजित रहे । राजस्थानका लागि हसरंगा बाहेक कुनै पनि बलरले सफलता पाउन सकेनन् ।
यो खेलमा राजस्थानले उत्कृष्ट सुरुवात गरेको थियो । यशस्वी जैसवाल र सञ्जु सामसनबीच पहिलो विकेटका लागि ३३ रनको साझेदारी भएको थियो । चौथो ओभरमा वैभव अरोराले विकेटकिपर ब्याट्सम्यान सामसनलाई बोल्ड गरे । उनी ११ बलमा १३ रन बनाएर आउट भए ।
त्यसपछि रियान पराग र जैसवालले जिम्मेवारी सम्हालेका थिए । दुवैले दोस्रो विकेटका लागि ३४ रन जोडे । कप्तान परागले २५ रन बनाउन सके । राजस्थानका लागि ध्रुव जुरेलले सर्वाधिक ३३ रनको इनिङ खेले । उनका अलावा नितिश राणाले आठ, वानिन्दु हसरंगाले चार, शुभम दुबेले नौ र जोफ्रा आर्चरले १६ रन बनाए ।
महिष तिक्षाणा र तुषार देशपाण्डेले क्रमशः १ र २ रन बनाएर अविजित रहे । केकेआरका लागि वैभव अरोरा, हर्षित राणा, मोइन अली र वरुण चक्रवर्तीले २–२ विकेट लिए । योसँगै स्पेन्सर जोन्सनले जोफ्रा आर्चरको रूपमा अन्तिम ओभरमा सफलता पाए ।
यो जितसँगै कोलकाता तालिकाको छैटौं स्थानमा उक्लिएको छ । अर्कोतर्फ राजस्थान लगातार दुई खेलमा पराजित हुँदै पुछारमा पुगेको छ । सनराइजर्स हैदरावाद २ अंक र २.२०० को नेट रनरेटका साथ शीर्ष स्थानमा छ ।
आजको खेलः सनराइजर्स हैदराबाद भर्सेस लखनउ सुपर जायन्ट्स – ७ः४५ बजे
