काठमाडौं । माध्यमिक शिक्षा परीक्षा एसईई जारी छ । अभिभावकहरु आफ्ना बालबालिकाले परीक्षा कस्तो गरेका छन् भन्नेमा कौतुहलतामा देखिन्छन् । विद्यार्थी पनि सकेसम्म राम्रो परीक्षा होस् भन्ने प्रयासमा छन् ।
एसईईलाई सहज, मर्यादित र व्यवस्थित बनाउन सहयोग पुर्याउन राष्ट्रिय परीक्षा बोर्डले आग्रह गरेको छ । बोर्डले देशभरका परीक्षा केन्द्रमा अनुगमन समेत गरिरहेका छन् । त्यसका लागि उसले आफ्ना कर्मचारी र सरोकारवालाई तोकेको छ । परीक्षा अनुगमन गर्न अनुमति अनिवार्य छ । बोर्डबाट अनुमति लिएर परीक्षा अनुगमन गर्न पाइन्छ ।
एसईईको अनुगमन आधिकारिक व्यक्तिले मात्र गर्न पाउँछन् । तर परीक्षा केन्द्रहरुमा अनधिकृत व्यक्तिसमेत अनुगमनका नाममा पुगिरहेका छन् । विद्यार्थीले शान्त वातावरणमा परीक्षा दिन पाउनुपर्नेमा अनावश्यक रुपमा अनुगमनका नाममा धेरैभन्दा धेरै व्यक्ति पुग्दा समस्या हुने गरेको छ । शान्त वातावरण खल्बलिन सक्छ ।
केही परीक्षा केन्द्रबाट त गुनासाहरु पनि आउन थालिसकेका छन् । अनुगमनका नाममा आधिकारिक व्यक्तिहरु बाहेक धेरै व्यक्ति परीक्षा केन्द्रहरुमा गएर परीक्षार्थीहरुको लेखन कार्यमा असुविधा भएको भन्दै गुनासो आएका हुन् । सामाजिक सञ्जालहरुमा पनि अनुगमनका नाममा भइरहेको भीडबाडका तस्बिर सार्वजनिक भइरहेका छन् ।
सामान्यत: परीक्षाको अनुगमन गर्न प्रदेश परीक्षा सञ्चालन तथा व्यवस्थापन समिति र जिल्ला परीक्षा समन्वय समितिका अधिकारिक व्यक्तिले पाउँछन् । तर अहिले कतिपय ठाउँमा यसबाहेकका धेरै व्यक्ति र समूह अनुगमनका नाममा विद्यालयहरुमा पुगिरहेका छन् । यसले परीक्षालाई व्यवस्थित, भयरहीत र शान्तपूर्ण वातावरणमा सञ्चालन गर्न अवोध सिर्जना भएको छ ।
अनुगमन र अवलोकनको नाममा परीक्षार्थीहरुलाई अनावश्यकरुपमा असहज हुने मानसिक तनाव दिने तवरबाट परीक्षा केन्द्रमा प्रवेश गर्ने कार्य गर्नु हुँदैन । यसरी अनधिकृत व्यक्ति परीक्षा केन्द्रमा पसेमा परीक्षार्थीको ध्यान भंग हुने मात्र होइन, परीक्षाको गोपनियतामाथि नै प्रश्न उठ्छ । विद्यार्थीको भविष्य निर्धारण गर्र्ने परीक्षालाई मर्यादित र व्यवस्थित बनाउन विद्यार्थी, अभिभावक, विद्यालय मात्र नभएर समुदाय र सरोकारवालाको भूमिका पनि उत्तिकै महत्वपूर्ण छ ।
