काठमाडौं । प्रहरी महानिरीक्षक (आइजीपी) बसन्तबहादुर कुँवर आजदेखि अनिवार्य अवकाशका कारण घर जाने भएका छन् । कुँवरसहितका ९ जना उच्च अधिकारीहरु आजदेखि अवकाशमा जान लागेका हुन् । तर सरकारले अहिलेसम्म नयाँ आईजीपी कसलाई बनाउने भन्ने टुंगो लगाएको छैन ।
आईजीपी कुँवरसँगै ५ जना प्रहरी अतिरिक्त महानिरीक्षक (एआईजी) र ३ जना प्रहरी नायव महानिरीक्षक (डीआइजी) ले पनि ३० वर्षे सेवा अवधिका कारण चैत ५ देखि एकैसाथ अनिवार्य अवकाश पाउन लागेका हुन् ।
कुँवरसँगै अनिवार्य अवकाश पाउने एआईजीहरुमा जनक भट्टराई, टेकप्रसाद राई, कुबेर कडायत, दुर्गा सिंह र बुद्धि गुरुङ छन्। त्यसैगरी अवकाश पाउने डीआईजीहरुमा भोला रावल, गणेश चन्द र ध्रुवराज राउत छन् ।
मन्त्रिपरिषदको आज बस्ने बैठकले नयाँ आईजीपी नियुक्त गर्ने तयारी गरेको छ ।
आईजीपीमा एआईजीहरु दीपक थापा, सुदीप गिरी र टेकबहादुर तामाङ प्रतिस्पर्धामा छन् । उनीहरुमध्येबाट एक जना नयाँ प्रहरी महानिरीक्षक चुनिने छन् ।
साथै सरकारले रिक्त एआईजी र डीआइजी पदमा केहीलाई बढुवा गर्ने तयारी गरेको छ ।
