एजेन्सी । आइसिसी च्याम्पियन्स ट्रफी २०२५ को दशौं खेलमा आज अस्ट्रेलिया र अफगानिस्तान भिड्दैछन् । लाहोरको गद्दाफी क्रिकेट स्टेडियममा हुन लागेको खेल नेपाली समयअनुसार दिउँसो २ः४५ बजेबाट सुरु हुनेछ ।
दुवै टोलीले दुई–दुई खेल खेलिसकेका छन् । अस्ट्रेलियाले एक खेलमा जित र एक खेलमा हार बेहोरेको छ । अफगानिस्तानले पनि एक खेल हारेको थियो भने अर्को जितेको थियो ।
च्याम्पियन्स ट्रफीको इतिहासमा भने अष्ट्रेलिया र अफगानिस्तान पहिलो पटक भिड्दैछन् । यी दुई टोलीले हालसम्म जम्मा ४ ओडिआई खेलेका छन् । जसमा अष्ट्रेलियाले सबै खेल जितेको छ । तर, अफगान टोलीलाई हल्का रूपमा लिन भने सकिँदैन । टोलीले आफ्नो अन्तिम खेलमा इंग्ल्याण्डलाई पराजित गर्दै प्रतियोगिताबाट बाहिराएको थियो ।
आजको यो खेल जित्ने टोली समूह बी बाट सेमिफाइनलमा प्रवेश गर्नेछ । अफगानिस्तानको टोली हार्यो भने प्रतियोगिताबाट बाहिरिने छ भने काङ्गारु टोली हार्यो भने दक्षिण अफ्रिका र अष्ट्रेलियाबीचको खेलको नतिजामा भर पर्नेछ ।
अस्ट्रेलिया र अफगानिस्तान पछिल्लो पटक २०२३ को एकदिवसीय विश्वकपमा भिडेका थिए । यस खेलमा अफगानिस्तानले २९२ रनको लक्ष्यमा कंगारुको ९२ रनमा ७ विकेट गुमाएको थियो । त्यसपछि ग्लेन म्याक्सवेलको दोहोरो शतकको आधारमा टोलीले ४६.५ ओभरमा ३ विकेटले जित हात पारेको थियो । उक्त खेलमा अलराउन्डर म्याक्सवेलले १२८ बलमा २०१ रनको अविजित इनिङ खेलेका थिए ।
पिच रिपोर्ट
गद्दाफी रंगशालाको पिच ब्याटिङमैत्री भएकोले यहाँ उच्च स्कोरका खेलहरु खेलाइन्छ । स्टेडियममा हालसम्म ७१ ओडीआई खेलिएको छ । जसमा पहिले ब्याटिङ गर्ने टोलीले ३६ खेल जितेको छ भने बलिङ गर्ने टोलीले ३३ खेल जितेको छ । योसँगै एक खेलको नतिजा आउन सकेन । यहाँ उच्चतम स्कोर ३७५/३ हो, जुन पाकिस्तानले २०१५ मा जिम्बाब्वे विरुद्ध बनाएको थियो । गद्दाफी स्टेडियममा सर्वाधिक रनको चेज ३५६/५ हो, जुन यसै प्रतियोगितामा अष्ट्रेलियाले इङ्ल्यान्डविरुद्ध गरेको थियो ।
दुबै टोलीको सम्भावित प्लेइङ:११
अष्ट्रेलियाः स्टिभ स्मिथ (कप्तान), म्याथ्यु सर्ट, ट्राभिस हेड, मार्नस लाबुसचेन, एलेक्स केरी, जोश इङ्लिस (विकेटकिपर), ग्लेन म्याक्सवेल, बेन द्वारसा, नाथन एलिस, स्पेन्सर जोन्सन र एडम जाम्पा।
अफगानिस्तानः हस्मातुल्लाह शाहिदी (कप्तान), इब्राहिम जद्रान, रहमानउल्लाह गुरबाज, सेदिकुल्लाह अटल, रहमत शाह, अजमातुल्लाह ओमरजाई, मोहम्मद नाबी, गुलबादिन नाइब, राशिद खान, नूर अहमद र फजल हक फारुकी।
