काठमाडौं । बितेको २४ घण्टामा देशभरमा गरेर थप ९२७ जना कोरोनाभाइरस संक्रमित शुक्रबार थपिएका छन् । संक्रमितमा ३३४ महिला र ५९३ जना पुरुष रहेका छन् । शुक्रबारको नियमित प्रेस ब्रिफिङमा स्वास्थ्य मन्त्रालयका प्रवक्ता डा जागेश्वर गौतमले ९२७ संक्रमित थपिएसँगै देशभर कुल संक्रमितको संख्या ३६ हजार ४५६ पुगेको बताए । यस्तै शुक्रबार काठमाडौंमा ३५० ललितपुरमा ११ र भक्तपुरमा ५४ गरी राजधानी उपत्यकामा ४१५ जनामा संक्रमण पुष्टि भएको छ । यो अहिलेसम्मको सबैभन्दा ठूलो संख्या हो । बितेको २४ घण्टामा १६९ जना निको भएका छन् भने जुन नगण्य संख्या हो । यससँगै निको हुनेको संख्या २० हजार २४२ पुगेको छ । अहिले पनि देशभर गरेर सक्रिय संक्रमितको संख्या १६ हजार १९ रहेको छ । तर सरकारले भने बितेको २४ घण्टामा १० हजार २२९ मात्रको पीसीआर गरेको छ । अझ अर्काे दुःखद पक्ष त यो छकि गएको २४ घन्टामा नेपालमा १२ जनाले यो संक्रमणबाट ज्यान गुमाएका छन् । यो पनि अहिलेसम्मकै २४ घन्टामा ज्यान गएको पहिलो ठूलो संख्या हो ।
के गर्दैछन् उपत्यकाको स्थानीय सरकार ?
माथिको आँकडाबाट देखिन्छ कि काठमाडौँ उपत्यकामा कोरोनाभाइरस संक्रमितको संख्या दिनप्रतिदिन बढ्दो छ । साथै यहाँको स्थानीय तहले प्रभावकारी काम गर्न नसकेको गुनासो पनि बढिरहेको छ । अहिले उपत्यकामा दैनिक कम्तीमा पनि ३ सयको हाराहारीको संख्यामा कोरोना संक्रमित भेटिन थालेका छन् । तर ती संक्रमितलाई राख्ने ठाउँ खोइ त ? उपत्यकाभरिमै पर्याप्त आइसोलेशनको अभाव छ । कोरोनाकै उपचार गर्ने भनिएका डेडिकेटेड अस्पतालमा बेड छैनन् अरु अस्पतालमा उपचार छैन । एकातिर छ भने अर्कोतिर संक्रमितको सम्पर्कमा रहेका व्यक्तिहरुको कन्ट्याक्ट ट्रेसिङ पनि हुन सकेको छैन । सबैको गुनासो छ कि संक्रमित कहाँ छन्, के गर्दैछन्, उनीहरुका नजिकका मानिसको पहिचान कस्ले गर्दैछ ? यो कसैले हेरेको छैन किनभने अनुगमनको यहाँ कुनै निकाय नै छैन ।
अहिलेको संकटमा सबैभन्दा बढी भूमिका खेल्नुपर्ने उपत्यकामा स्थानीय निकायहरु कसरी काम गर्दैछन् त ?यो कसैलाई थाहा छैन । बरु देशबाहिर भएको संक्रमणको नियन्त्रणमा स्थानीय निकाय लागिपरेका थिए त्यो हामीले देखेकै थियौँ । तर यहाँको स्थानीय सरकार अटेर छ, संघीय सरकारभन्दा माथि छ । बागमती प्रदेश सरकार खोज्न त हेटौँडा नै पुग्नुपर्छ जसको मकवानपुर जिल्लाका सिडियोको भन्दा पनि कम हैसियत र प्रभाव देखापर्दछ । यहीँनेर देशमा प्रदेश सरकारको औचित्य समाप्त भएको पुष्टि हुदै गएको जनताले नै छर्लंगै देखेका छन् । काठमाडौं महानगरपालिका, ललितपुर महानगरपालिका र भक्तपुर नगरपालिकाले के काम गरेका छन् त अहिले ? खोई राजधानीमा आइसोलेसन वार्ड ? यहाँको कन्ट्याक्ट ट्रेसिङको काम कसले कहाँ र कसरी गर्ने हो ? अहँ राजधानी उपत्यकाबासीका यी अनगिन्ती प्रश्नहरु यो समाचार तयार पार्दासम्म अनुत्तरित नै छन् ।
देश दुखेको धेरै भयो तर राजधानी नदुखेपछि बाहिरको दुखाइको अनुभूति यहाँ हुदैन । यो त नेपालको पुरानै रोग हो । अहिले त झन् यो रोग नबल्झिने कुरै छैन । किनभने यहाँ राम्रो काम आफूले नगरेको भए पनि जस लिने होड चल्छ हाम्रो राजनीतिक संस्कारमा । अहिलेको सरकारका मन्त्रीहरु देशमा राम्रो भएको कुरा आफैले गरेको जस लिन्छन् तर आफ्नै कारणले गर्दा भएको नराम्रोको लागि पनि अघिल्लो सरकारलाई देखाउँछन् । जुन कुरा दिनदिनै हामीले सुनेकै हो । चीनको वुहानमा संक्रमण फैलिएको बेला यता नेपालको संसदमा सरकारको तयारी के छ भनेर सोध्दा स्वास्थ्य मन्त्री भानुभक्त ढकालले चीनमा माओले कस्तो जुत्ता लागेका थिए भनेर यहाँ खुट्टा उचाल्नुपर्दैन अर्थात यहाँ त्यो महामारी आइपुग्दैन भनेर बडो लाजमर्दाे जवाफ दिएका थिए । उनका अहिलेसम्मका क्षुद्रताले नेपाली जनतालाई बडो आहत बनाएको छ । उनीबाट औषधिमूलो त के सरल र सरस व्यवहार नै जनताले पाउन सकेका छैनन् ।
आजको एक प्रसंग यहाँ कोट्याउन चाहन्छु । आज कोरोना सिंहदरबार छिरेको खबर आएको छ । गृह, रक्षामन्त्रीहरु तथा पूर्वप्रधानमन्त्री पनि आइसोलेसनमा बसेको खबर आएको छ । हिजो बाहिर देशैभरि थियो तर राजधानी यसरी कस्सिएर आएको थिएन । किनभने राजधानीले आफूलाई घेरामा पारेर सुरक्षित भएर मात्र बसेको थियो । दुई नम्बर प्रदेशमा यसले धेरै दुखायो । पाँचमा पनि त्यस्तै भयो तर त्यहाँका मुख्यमन्त्री प्राय पार्टी झगडा मिलाउन राजधानीमै बिताए । हाम्रो सरकार र पार्टीहरु पनि पदका लागि धेरै धाए, लडे । कोरोनाको नियन्त्रणका लागि केही गरेनन् । औषधि खरिदमा त्यस्तो जात्रा देखाए । सरकारका समर्थनमा जुलुशै निकाल्न लगाए । किने भने त्यसताका यो भाइरसले सिंहदबारको बाटो तय गरेको थिएन, अनि राजधानीबाहिरका नागरिकलाई दुख्दा यहाँका शासकलाई दुखेन, दुख्दैन । हुन त जनता भन्दैछन् यसरी रोग छिर्नु दुःखद कुरा हो । तर पनि यसअघि बडो नराम्रोसँग दुखेका नरैनापुर तथा हालसालैका बारा पर्साका जनता भन्दैछन्– सिंहदरबार छिर्यो कोरोना अब त दुख्ला कि ? अब त शासकले कानमा हालेको यसअघिको तेल निकाल्लान कि ? अब चाहिँ महामारी रोक्न खास र ठोस कार्यक्रम आउला कि ?
