काठमाडौँ । विराट कोहलीको शतकको आधारमा भारतले च्याम्पियन्स ट्रफीमा पाकिस्तानलाई ६ विकेटले पराजित गरेको छ ।
भारतका लागि विराट कोहलीले अविजित १००, श्रेयस अय्यरले ५६ र शुभमन गिलले ४६ रन बनाए । बलिङतर्फ कुलदीप यादवले ३ तथा हार्दिक पाण्ड्याले २ विकेट लिए । यस्तै अक्षर पटेल, रविन्द्र जडेजा र हर्षित राणाले १–१ विकेट लिए ।
पाकिस्तानका लागि साउद शकीलले ६२ र मोहम्मद रिजवानले ४६ रन बनाए । शाहिन शाह अफ्रिदीले २ विकेट लिए । अबरार अहमद र खुशदिल शाहले १–१ विकेट लिए ।
आइतबार दुबईमा भएको खेलमा पाकिस्तानले पहिले ब्याटिङ रोजेको थियो । टोली ४९.४ ओभरमा २४१ रन बनाएर अलआउट भयो । भारतले ४२.३ ओभरमा ४ विकेट गुमाएर लक्ष्य पुरा गरेको थियो ।
प्रतियोगितामा भारतको यो दोस्रो जित हो । टोलीले बिहीबार बंगलादेशलाई ६ विकेटले पराजित गरेको थियो । लगातार दोस्रो हारसँगै पाकिस्तान प्रतियोगिताबाट बाहिरिने संघारमा पुगेको छ । टोलीले बंगलादेशसँग एक खेल खेल्न बाँकी छ ।
भारतले पाँचौं ओभरमा पहिलो विकेट गुमाएको थियो । रोहित शर्मा २० रन बनाएर आउट भए । नम्बर ३ मा आएका विराट कोहलीले सावधानीपूर्वक ब्याटिङ गरे । उनले शुभमन गिलसँग ६९ र श्रेयस अय्यरसँग ११४ रनको साझेदारी गरे । कोहली अन्तिमसम्म टिके ।
उनले ४३ औं ओभरमा खुशदिल शाहविरुद्ध चौका प्रहार गर्दै आफ्नो शतक पूरा गरे र टोलीलाई जित दिलाए ।
विराटले एकदिवसीय क्रिकेटमा ५१औँ शतक र अन्तर्राष्ट्रिय क्रिकेटमा ८२औँ शतक प्रहार गरे । उनी एसिया कप, एकदिवसीय विश्वकप र च्याम्पियन्स ट्रफीमा पाकिस्तानविरुद्ध शतक प्रहार गर्ने विश्वकै पहिलो खेलाडी बने । आफ्नो शतकसँगै उनले एकदिवसीय क्रिकेटमा १४ हजार रन र अन्तर्राष्ट्रिय क्रिकेटमा २७ हजार ५ सय रन पनि पुरा गरेका छन् ।
