विराटनगर। पूर्वराष्ट्रपति विद्यादेवी भण्डारीले कोशी प्रदेश भ्रमणको क्रममा विराटनगरका युवा वैज्ञानिकहरूसँग अन्तर्क्रिया गर्नुभएको छ।
यस कार्यक्रममा विराटनगर क्षेत्रका सक्रिय युवा वैज्ञानिक, इन्जिनियर, युवा प्राध्यापक र विज्ञान क्षेत्रका विद्यार्थीहरू सहभागी थिए। भण्डारीले आफ्नो भ्रमणलाई शैक्षिक संस्थाहरूको भ्रमणको रूपमा व्याख्या गर्दै भन्नुभयो, “मैले देशभरका युवाहरूसँग निरन्तर अन्तर्क्रिया गर्दै आएको छु, र नेपालको शिक्षामा आमूल परिवर्तनको आवश्यकता छ।”
पूर्वराष्ट्रपतिले शिक्षा, विज्ञान र प्रविधि, स्वास्थ्य, जलवायु परिवर्तन र तिनीहरूको असरमा ध्यान केन्द्रित गरेको बताउँदै वर्तमान समस्याको समाधान सामूहिक प्रयासबाट मात्र सम्भव हुने धारणा व्यक्त गर्नुभयो।
विराटनगरसँग आफ्नो गहिरो भावनात्मक र राजनीतिक सम्बन्ध रहेको उल्लेख गनुहुँदै भण्डारीले महेन्द्र मोरङ क्याम्पसको शैक्षिक र भौतिक गुणस्तरमा सुधारको लागि निरन्तर काम गर्दै आएको बताउनुभयो। कार्यक्रममा सहभागी युवा वैज्ञानिकहरूको समस्याहरूलाई ध्यानपूर्वक सुनेर उहाँले समाधानका लागि आफूले पहल गर्ने प्रतिवद्धता व्यक्त गर्नुभयो।
खासगरी पाठ्यक्रम, भौतिक असुविधा र अनुसन्धानको वातावरणको अभावले युवा वैज्ञानिकहरू पलायन हुने अवस्थामा रहेको उल्लेख गर्नुहुँदै उहाँले राज्यले यसको समाधानका लागि आवश्यक कदम चाल्नुपर्ने आवश्यकता औंल्याउनुभयो।
नेपालमा कृषि, वन र बनस्पति स्रोतको उपयुक्त उत्पादन नगरी अरबौं रुपैयाँ बाहिर जानु दुर्भाग्यपूर्ण भएको र त्यस पैसालाई देशभित्र राखेर शिक्षा र विज्ञान प्रविधिको विकासका लागि पूंजी जुटाउन सकिने कुरा भण्डारीले बताउनुभयाे। यसका साथै उहाँले उत्पादनमुखी अर्थतन्त्र निर्माणमा युवाहरूको सक्रियता र भूमिका आवश्यक रहेको कुरामा जोड दिनुभयो।
नेपालका विश्वविद्यालयहरूलाई अनुसन्धानमुखी बनाइ दक्ष जनशक्तिको उपयोग देश निर्माणमा गर्नुपर्ने आवश्यकता बारे सरकारलाई सचेत गराउने कुरा पनि उहाँले प्रतिवद्धता व्यक्त गर्नुभयो।
पूर्वराष्ट्रपति भण्डारीले युवाहरूको भूमिकामा विश्वास व्यक्त गर्दै भन्नुभयाे, “नेपालको विकास र समृद्धिका लागि युवाहरूको भूमिका महत्वपूर्ण छ, र म देशभरका युवासँग निरन्तर संवादमा रहनेछु।”
कार्यक्रममा सहभागी युवा वैज्ञानिकहरूले आफूहरूलाई पूर्वराष्ट्रपति संग आफ्ना समस्याहरू खुला रूपमा राख्न पाएकोमा खुशी व्यक्त गर्दै, शिक्षा, विज्ञान, प्रविधि, स्वास्थ्य र जलवायु परिवर्तनका विषयमा उठेका समस्याहरूको समाधानमा आफ्नो निरन्तर साथ र सहयोग रहने प्रतिवद्धता जनाए।
