काठमाडौं । दशैं भन्ने वित्तिकै धेरैलाई लिङ्गे पीङको सम्झना आउँछ । विशेष गरी गाउँघरमा पीङ भएको ठाउँमा त भेला जस्तै लाग्छ । शहर बजारमा पनि पीङप्रतिको मोह कम भएको छैन ।
बालबालिकाहरु पीङ खेल्न भनेपछि हुरुक्कै हुन्छन् । सानोमा खेलेको पीङको यादकै कारण पाका उमेरका व्यक्तिसमेत यसमा आकर्षित हुन्छन् ।
बूढापाकाहरुले समेत दशैंको टीकाको दिन धर्ती छाड्नुपर्छ भन्ने मान्यताका आधारमा एकपटक पीङ खेल्नुपर्छ भन्ने मान्यता राख्छन् ।
काठमाडौंका थुप्रै ठाउँमा यस्ता पीङ बनाइएका छन् । कति ठाउँमा स्थानीयहरूले बनाएका छन् भने कतिपय ठाउँमा सशस्त्र प्रहरी बलले स्थानीय तहको समन्वयमा पीङ बनाइदिएको छ ।
विगत वर्षहरू जस्तै यस वर्ष पनि सर्वसाधारणका लागि सशस्त्र प्रहरी बलले देशभरी स्थानीय निकायसँगको समन्वय समेतमा १ सय ९७ वटा लिङ्गे पिङ राखेको छ । विगत करिब १४ वर्षदेखि पिङ राख्ने कार्यलाई यो वर्ष पनि निरन्तरता दिइएको हो ।
म्याग्दीको अन्नपूर्ण गाउँपालिका–७ घराम्दी गाउँमा दसैँको अवसरमा हालिएको लिङ्गेपिङ खेल्नका लागि मगर समुदायको मौलिक वेशभूषामा सजिएर भेला भएका स्थानीयबासीहरु र पृष्ठभूमिमा देखिएको निलगिरी र अन्नपूर्ण हिमशृङ्खलाको दृष्य । तस्बिर – सन्तोष गौतम, रासस
कपिलवस्तुको चन्द्रौटामा बुधबार पिङ खेल्दै बालबालिका । तस्बिरः सनिउल्ला धोबी/रासस
म्याग्दीको अन्नपूर्ण गाउँपालिका–५ पाउद्धारमा दसैँका अवसरमा हालिएको लिङ्गेपिङ खेल्दै स्थानीय महिला । तस्बिर: सन्तोष गौतम/ रासस
नेपालको पर्यटकीय राजधानी पोखराको लेकसाइडमा बडादसैँका अवसरमा बिहीबार चर्खे पिङ खेलेर रमाउँदै विदेशी पर्यटक । तस्बिर : कृष्ण दवाडी / रासस
सिन्धुलीको कमलामाई नगरपालिका–२ भद्रकालीका स्थानीयबासीले दसैँको अवसरमा हालेको लिङ्गे पिङमा मच्चिदै बालिका । घटस्थापना सुरु भएदेखि नै गाउँमा दसैको रमाइलो सुरु हुन्छ । यही रमाइलोका लागि गाउँघर र टोलटोलमा हालिने लिङ्गे पिङ हिजोआज लोप हुने अवस्थामा छ । तस्बिरः राधिका बुढाथोकी / रासस
ताप्लेजुङको फुङ्लिङ नगरपालिका–५ मा बडादसैँका लागि निर्माण गरिएको लिङ्गे पिङमा रमाउँदै बालबालिका । तस्बिरः दिलकुमार लिम्बू/रासस
भक्तपुरको चाँगुनारायण नगरपालिका-५ स्थित पीखेल हाइटमा लिङ्गे पिङ खेल्दै स्थानीय । तस्बिर : किरणराज विष्ट/रासस
