एजेन्सी । जुनियर एनटीआर र जान्हवी कपूर स्टारर फिल्म ‘देवराः पार्ट १’ सेप्टेम्बर २७ देखि सिनेमाघरमा रिलिज भइरहेको छ ।
हिन्दी, तमिल, तेलुगु, मलयालम, कन्नड भाषामा रिलिज भएको यस फिल्मसँग सम्बन्धित धेरै भिडियोहरू सामाजिक सञ्जालमा चर्चामा छन्, जसमा फ्यानहरू रमाइलो गरिरहेका छन् ।
यसैबीच जुनियर एनटीआरका एक फ्यानको फिल्म हेर्दै गर्दा मृत्यु भएको खबर आएको छ ।
डेक्कन क्रोनिकलको रिपोर्ट अनुसार हालै आन्ध्र प्रदेशको कुड्डापाहमा जुनियर एनटीआरका फ्यानहरूका लागि विशेष स्क्रिनिङको आयोजना गरिएको थियो ।
यही क्रममा जमनपल्ले गाउँका मस्तान वली पनि चलचित्र हेर्न आफ्नो गाउँबाट कुड्डापा पुगेका थिए ।
पहिलो शोमा साथीभाइसँग रमाइलो गर्दै फिल्म हेर्दै गर्दा अचानक बेहोस भए । होश नआएपछि साथीहरूले उनलाई नजिकैको निजी अस्पतालमा लगे, जहाँ चिकित्सकले उनलाई मृत घोषणा गरेका थिए । उनको मृत्युको कारण हृदयघात भएको बताइएको छ ।
