एजेन्सी । हेमा समितिको प्रतिवेदन बाहिर आएपछि मलयालम अभिनेत्री रेवती सम्पथले वरिष्ठ अभिनेता सिद्दिकीविरुद्ध शारीरिक दुर्व्यवहारको आरोप लगाएकी थिइन् ।
केरला उच्च अदालतले सिद्दिकीलाई अग्रिम जमानत दिन अस्वीकार गरेको छ । अभिनेतालाई अदालतमा हाजिर हुन भने पनि अभिनेता अदालतमा उपस्थित भएनन् ।
अहिले उनीविरुद्ध पक्राउ पुर्जी जारी भएको छ । प्रहरीले उनलाई पक्राउ गर्न घर पुग्यो तर त्यतिन्जेलसम्म अभिनेता फरार भइसकेका थिए ।
उनले प्रयोग गरेका दुवै मोबाइल नम्बर पनि स्वीच अफ छन् । यस्तो अवस्थामा उनलाई फरार घोषणा गरिएको हो । अभिनेताले जमानतका लागि सर्वोच्च अदालत जाने खबर आएको छ ।
हेमा समितिको प्रतिवेदन बाहिर आएपछि दक्षिण अभिनेत्री रेवती सम्पतले अभिनेता सिद्दिकीविरुद्ध गत अगस्टमा त्रिभाण्ड संग्रहालय प्रहरी चौकीमा शारीरिक दुव्र्यवहारको उजुरी दिएकी थिइन् ।
अभिनेत्रीले आरोप लगाएकी छिन् कि ८ वर्ष पहिले २०१६ मा सिद्दिकीले उनलाई मस्कट होटलमा एक फिल्मको बारेमा छलफल गर्न बोलाका थिए, जहाँ उनको शारीरिक शोषण भएको थियो ।
उजुरी दिनुअघि नै रेवतीले यो घटनाबारे कुरा गरेकी थिइन् । तर, सिद्दिकीले त्यसबेला रेवतीले आफूलाई अनावश्यक रूपमा फसाउन खोजेको स्पष्ट पारेका थिए ।
बरिष्ठ अभिनेता सिद्दिकी मलयालम चलचित्र कलाकार संघको महासचिव थिए, तर आरोप लागेपछि उनले पदबाट राजीनामा दिएका छन् । मलयालम सिनेमाबाट आएका यौन उत्पीडनका घटनाहरूको छानबिन गर्नका लागि विशेष अनुसन्धान टोली गठन गरिएको थियो ।
