काठमाडौं । आईसीसी विश्वकप लिग–२ प्रतियोगितामा नेपाल ओमनसँग एक विकेटले पराजित भएको छ । नेपालले दिएको दुई सय २० रनको लक्ष्य भेट्टाउँदै ओमानले जित हासिल गरेको हो ।
क्यानडाको म्यापल लिफ नर्थ–वेस्ट ग्राउन्ड (ए), किङ सिटी, अन्टेरियोमा भएको खेलमा ओमानले टस जितेर पहिले बलिङ गर्ने निर्णय गरेको थियो । ओमानले नेपालले दिएको लक्ष्य ४९ दशमलव ५ ओभरमा नौ विकेटको क्षतिमा भेट्टाएको हो ।
नेपालले दिएको २२१ रनको लक्ष्य ओमानले अन्तिम बल बाँकी छँदा ९ विकेटको क्षतिमा पूरा गर्दै रोमाञ्चक जित निकाल्न सफल भयो ।
अन्तिम दुई ओभरमा ओमानलाई १० रन चाहिएको थियो भने एक विकेट मात्र बाँकी थियो । जसमा नेपालका करण केसीले ४९औं ओभरमा २ रन मात्र खर्चिए ।
त्यसपछि ओमानलाई अन्तिम ओभरमा ८ रन चाहियो । ओमानका कलीमुल्लाहले नेपालका सोमपाल कामीविरूद्ध पहिलो बलमा एक रन लिँदा सकील अहमदले दोस्रो बलमा चौका र चौथो बलमा एक रन लिए । पाँचौ बलमा कलीमुल्लाहले चौका प्रहार गरेपछि ओमानले एक बल बाँकी छँदा जित निकाल्यो ।
नेपालका लागि गुलशन झाले सानदार बलिङ गरे । उनले कप्तान अकिब इल्यासलाई २९ रन, आयान खानलाई ९ रन, शोहिब खानलाई २६ रन, फयज बटलाई ८ रन र जय ओडेड्रालाई ५ रनमा आउट गर्दै पाँच विकेट लिए ।
उनले १० ओभरमा २ मेडन राख्दा ४७ रन दिए । करण केसीले २ विकेट लिँदा सन्दीप लामिछाने र आरिफ शेखले १–१ विकेट आफ्नो नाममा लेखाए।
त्यसअघि ओमानले टस जितेर फिल्डिङ रोजेपछि पहिले ब्याटिङ गरेको नेपालले ९ विकेटको क्षतिमा २२० रन जोड्यो ।
नेपालका लागि कप्तान रोहितकुमार पौडेलले ६० रन जोडे । उनले ७२ बल खेल्दा २ चौका र ४ छक्का प्रहार गरे । यस्तै गुलशन झाले ३५ बलमा ५३ रनको योगदान दिए । उनले ३ चौका र ५ छ्क्का प्रहार गरे ।
सोमपाल कामीले ८ बलमा २ छक्का प्रहार गर्दै २० रन जोडेपछि नेपालले २ सय रन कटायो ।
तर, नेपालको सुरुवात भने राम्रो भएन । कुशल भुर्तेलको स्थानमा ओपनिङको मौका पाएका अर्जुन साउदले ५ रन मात्र जोड्न सके । अर्का ओपनर आसिफ शेख ११ रनमा आउट भए । भीम सार्कीले पनि ११ रन मात्र जोड्न सके।
दोस्रो खेलमा मौका पाएका आरिफ शेखले ८८ बल खेल्दा ३५ रन बनाउन सके । सातौं नम्बरमा ब्याटिङको मौका पाएका अनिलकुमार साह पनि चल्न सकेनन् । उनी ९ बलमा ३ रन जोडेर आउट भए । सन्दीप लामिछाने ११ रन र करण केसी १ रन जोडे ।
नेपालले अघिल्लो खेल खेलेका कुशल भुर्तेल, दीपेन्द्रसिंह ऐरी र कुशल मल्लको स्थानमा अर्जुन साउद, आरिफ शेख र अनिल साहलाई मैदान उतारेको थियो ।
बलिङमा ओमानका कलीमुल्लाह, फयज बट र अकिब इलियासले २–२ विकेट लिए ।
अब नेपालले तेस्रो खेल आइतबार राति घरेलु टोली क्यानडासँग खेल्नेछ ।
